Раҳмон ва Раҳим Аллоҳнинг исми билан (1:1)
3:1. Алиф Лом Мим
3:2. Аллоҳ, Ундан ўзга илоҳ йўқ, У Ҳайй Қайюм/Ҳаёт берувчи ва Ҳаётни бардавом қилувчи.
3:3. У сенга Китобни ҳақ ила нозил қилди – ўзидан олдингиларни тасдиқ этади – ундан олдин Таврот ва Инжилни ҳам
3:4. Одамлар учун Тўғри Йўлни кўрсатиш учун нозил қилган, ва Фурқон/ҳақ ва ботилни ажратиш таълимотини нозил қилган. Аллоҳнинг оятларига кофир бўлганларга Аламли Азоб бор. Аллоҳ Азиз ва Интиқомли /мудом ғолиб ва интиқом олувчи.
3:5. На Ерда, на Самода ҳеч нарса Аллоҳдан яширин қолмайди.
3:6. У сизни она раҳмида истагани суратда яратади, Ундан ўзга илоҳ йўқ, У Азиз ва Ҳаким /қодир ва ҳикмат эгаси.
3:7. Сенга Китобни нозил қилди. Ундаги баъзи оятлар бор – Муҳкам оятлар/ҳукмлари аниқ, улар Китобнинг онаси/аслидир; бошқа оятлар ҳам бор – Муташобиҳ оятлар/ ўзаро ўхшаш. Қалбида эгрилик бўлганлар, ўзлари ўхшатганларга эргашади, мақсадлари – фитна ва таъвиллари/оятлардаги ваъидларга дучор бўлиш. Уларнинг таъвилини/ҳақиқий маъносини фақат Аллоҳ билади. Илмда росих бўлганлар/теран илмга эга бўлганлар дейдиларки: “Унга ишониб тасдиқ этдик, барчаси Раббимиз ҳузуридан”. Ақл эгаларидан ўзга ҳеч ким ўгит/эслатма олмайди.
3:8. “Эй Раббимиз, Тўғри Йўлга йўллаганингдан кейин, қалбимизни эгмагин, ҳузурингдан раҳмат ёғдир, ҳақиқатан Сен мўл қилиб бергувчисан.
3:9. Эй Раббимиз, шак-шубҳа йўқ Кунда одамларни жамлагувчи Сенсан”. Аллоҳ асло сўзидан қайтмайди.
3:10. Кофир бўлганларнинг на моллари, на фарзандлари, Аллоҳга қарши ҳеч бир фойда беролмайди. Ана ўшалар Оловнинг ўтинларидир.
3:11. Худди Фиръавн хонадони ва улардан олдингиларнинг аҳволи каби. Улар ҳам оятларимизни ёлғон санагандилар, Аллоҳ уларни гуноҳлари билан ушлади. Аллоҳнинг азоби шиддатли.
3:12. Кофир бўлганларга айт: “Тез кунда мағлуб бўласиз ва жаҳаннамга қараб ҳайдаласиз. Қанчалар ёмон жой!”
3:13. Тўқнашган икки фирқада (2:247) сиз учун ибрат бор: Бир фирқа Аллоҳ йўлида урушди, бошқаси кофирлар эди, кўзига улар ўзларидан икки баробар кўп кўринарди. Аллоҳ истаганини Ўз ёрдами билан қўллайди. Албатта, кўз/басират эгаларига бунда ибрат бор.
3:14. Бу одамларга аёллар, ўғиллар, кўплаб йиғилган олтин ва кумуш, зотдор отлар, чорвалар ва экинлардан олинган завқларни ёқтириш жозибадор/чиройли қилинган. Булар, дунё ҳаётининг завқлари, қайтишларнинг энг гўзали эса – Аллоҳнинг ҳузурида.
3:15. Сен айт: “Булардан яхшироғини сизга хабар берайми? Тақво эгалари учун Рабби ҳузурида остларидан анҳорлар оққан боғ-роғлар бор, унда доимий қоладилар, покиза жуфтлар/мева турлари ва Аллоҳдан чексиз розилик бор”. Аллоҳ қулларни кўриб туради.
3:16. Улар дейдиларки: “Эй Раббимиз, биз ишониб тасдиқ этдик, гуноҳларимизни кечиргин, бизни дўзах азобидан асрагин!”
3:17. Улар сабр қилувчилар, содиқ қолганлар, чин кўнгилдан бўйин эгганлар, инфоқ этганлар ва саҳарларда кечирим истаганлардир.
3:18. Аллоҳ гувоҳлик берадики, Аллоҳдан ўзга илоҳ йўқ. (3:2) Малаклар, яъни адолатга риоя этган Илм эгалари ҳам шунга гувоҳки, Ундан ўзга илоҳ йўқ, Азиз Ҳаким ёлғиз Унинг Ўзидир /барчадан устун куч-қудрат ва илм-ҳикмат эгаси.
3:19. Аллоҳ наздидаги дин бу – Ислом. Китоб берилганлар эса, ўзларига бу маълумот келганидан кейин, ораларидаги ҳаддан ошишлар сабабли ихтилофга тушдилар. Ким Аллоҳнинг оятларига кофир бўлса, Аллоҳнинг ҳисоби ўта тез.
3:20. Сен билан тортишувга киришса, айт: “Мен борлиғимни тўлиғича Аллоҳга таслим этдим, менга эргашганлар ҳам шундай”. Китоб берилганлар ва Уммийларга айт: “Сиз ҳам шундай таслим бўлдингизми?” Агар шундай таслим бўлсалар, Тўғри Йўлни топган бўладилар. Агар юз ўгирсалар, сенинг зиммангда фақат етказиш бор, холос. Аллоҳ қулларни Ўзи кўриб туради.
3:21. Аллоҳнинг оятларига кофир бўлаётганларга, набийларни ноҳақлик билан ўлдираётганларга ҳамда одамлар орасида адолатни амр этувчиларни ноҳақлик билан ўлдираётганларга Аламли Азоб ҳақида хушхабар бер!
3:22. Уларнинг қилмишлари, дунёда ҳам, охиратда ҳам беҳуда. Уларга ёрдамчилардан ҳеч ким йўқ.
3:23. Китобдан насибаси бўлганларни кўрмадингми! Ораларида Аллоҳнинг Китоби ила ҳукм қилишига чақирилмоқдалар, улардан бир гуруҳ эса юз ўгириб бурилиб кетмоқда.
3:24. Ана шундай, бунга сабаб – уларнинг шу сўзлари: “Олов бизга фақат саноқли кунларда тегади, бошқа тегмайди”. Ўз уйдирмалари уларни динларида адаштириб қўйди.
3:25. Ҳеч шак-шубҳаси бўлмаган Кун келиб, уларни жамлаганимизда, ва ҳар кимнинг қилган меҳнатига лойиқ эвази тўлиқ берилиб, ҳеч кимга ноҳақлик қилинмаган Кунда қандай бўлади?!
3:26. Сен айт: “Эй Аллоҳ, Эй Мулк/Подшоҳлик Эгаси, бу Мулкни истаганингга ато этасан, истаганингдан тортиб оласан; истаганингни азиз айлайсан, истаганингни хор айлайсан. Хайр/Яхшилик Сенинг қўлингда. Барча нарсага Қодир Сен Ўзингсан!”
3:27. Кечани Кундузга киритасан, Кундузни Кечага; ўликдан тирикни чиқарасан, тирикдан ўликни; истаганингга ҳисобсиз ризқ берасан!
3:28. Имон келтирганлар, муминларни қўйиб, кофирларни валий/йўл кўрсатувчи қилиб олмасинлар – ким бундай қилса, Аллоҳ ила ҳеч нарсаси қолмайди – фақат улардан* сақланиш учун бўлса, мустасно. Аллоҳ сизни Ўзидан* огоҳлантиради. Қайтиш ёлғиз Аллоҳнинг ҳузурига. (*Уларнинг ҳузурига эмас, ҳисоб-китоб ва жавобгарлик ёлғиз Аллоҳга; *етиш эҳтимоли бўлган таҳликадан; *Унинг амрларига қарши келишдан)
3:29. Айт: “Дилингиздагини яширсангиз ҳам, ошкор этсангиз ҳам, Аллоҳ билиб туради уни; Осмонлару-Ерда нимаики бор бўлса, барчасини билиб туради. Аллоҳ барча нарсага қодир/барча нарсанинг ўлчовини белгилаган.
3:30. Кун келиб, ҳар бир жон ўз қилган ҳар бир яхшилигини ҳам, қилган ҳар бир ёмонлигини ҳам ҳозир ҳолда топади. У ёмонлиги билан ўзи орасида узоқ масофа бўлишини истайди. Аллоҳ сизни Ўзидан огоҳлантирмоқда. Аллоҳ, қулларига шафқатлидир.
3:31. Айт: “Агар Аллоҳни яхши кўрсангиз, менга тобеъ бўлинг, Аллоҳ ҳам сизни яхши кўради ва гуноҳларингизни кечиради. Аллоҳ Ғафур Раҳим /кечиримли, раҳмдил”
3:32. Айт: “Аллоҳга ва Расулга бўйсунинг!” Агар юз ўгирсалар, Аллоҳ кофирларни яхши кўрмайди.
3:33. Аллоҳ оламлар/барча қавмлар орасидан Одамни, Нуҳни, Иброҳим оиласини ва Имрон оиласини танлаб олди.
3:34. Бир-бирларидан бўлмиш зурриётлардир/издошлардир. Аллоҳ – Самиъ Алим/ Эшитгувчи ва Билгувчи.
3:35. Эсланг, Имроннинг аёли деди: “Эй Раббим, қорнимдагини тўлиғича Сенга атадим, мендан қабул айлагин; шак-шубҳасиз, Самиъ ва Алим Сенсан/эшитгувчи билгувчи”.
3:36. Уни туққач, Аллоҳ унинг не туққанини биларди, деди: “Эй Раббим, қиз туғдим, ўғил қиз каби эмас. Унга Марям дея исм қўйдим. Уни ва зурриётини Шайтони-рожиймдан Ўзинг паноҳингда асрагин”.
3:37. Рабби уни гўзал қабул ила қабул айлади. Уни гўзал бир новда каби етиштирди ва Закариё унга кафил бўлди. Закариё ҳар гал унинг ёнига, меҳробга кирганида, ёнида бир ризқ топарди. “Эй Марям, сенга бу қаердан?” дерди. “Бу, Аллоҳ ҳузуридан” дерди. “Аллоҳ истаганига ҳисобсиз ризқ беради”.
3:38. Ўша ерда Закариё Раббига дуо қилди: “Эгам, менга ҳузурингдан покиза зурриёт бер. Дуоларни Эшитгувчи Сенсан!”
3:39. Закариё, меҳробда Салот қиларкан/Буюрилган Йўлга даъват қиларкан, Малаклар унга дедилар: “Аллоҳ сенга Яҳё ҳақида хушхабар беради – Аллоҳдан бўлмиш Сўзни* тасдиқ этувчи, нафсига ҳоким ва ўзгаларга яхшилик қилувчи набий ҳақида хушхабар”. (*Аллоҳдан берилган Сўз – тарих бўйича Бани Исроилга бериб келинган МОШИАХ муждаси – Исо Масиҳ)
3:40. У деди: “Эй Раббим, менга қарилик етган, аёлим ҳам қариб қолган бўлса, қандай қилиб ўғлим бўлиши мумкин?” “Ана шундай, Аллоҳ, истаганини қилади”.
3:41. Деди: “Эй Раббим, менга бирор оят-аломат қилиб бер”. Деди: “Сенга оят-аломат – уч кун одамларга рамз/ишорат ила гапирасан; Раббингни кўп ёд айла, эртаю-кеч Уни покла!”
3:42. Малаклар деди: “Эй Марям, Аллоҳ сени танлади, поклади ва сени оламлар орасида танлаб олди/бошқа қавмлардаги аёлларга бермаган неъматини сенга берди.
3:43. Эй Марям, Раббингнинг амрига таслим бўл ҳамда бўйин эгувчилар билан бирга бўйин эггин!”
3:44. Мана шулар Биз сенга ваҳй этган ғайб хабарлари. Марямга қай бири кафил бўлади дея, қуръа ташлаганларида сен улар орасида эмасдинг; ўзаро тортишганларида ҳам у ерда йўқ эдинг.
3:45. Эсланг, мана Малаклар деди: “Эй Марям, Аллоҳ сенга Ўз ҳузуридан бўлмиш Сўз ҳақида хушхабар беради: Исми Марям ўғли Исо ал-Масиҳ; дунёда ҳам, охиратда ҳам мўътабар ва Аллоҳга яқинлардан.
3:46. Бешикда ҳам, улғайганда ҳам одамларга гапиради ва солиҳлардан бўлади”.
3:47. Деди: “Эй Раббим, менга бирорта одам тегинмаган бўлса, қандайин ҳам ўғлим бўлсин?” “Ана шундай, Аллоҳ истаганини яратади – бирор нарсани ирода этганида, унга “Бўл!” дейди, бўлади.
3:48. Унга Китобни, Ҳикматни, Таврот ва Инжилни ўргатади.
3:49. Уни Исроил Ўғилларига Расул қилиб юборади: “Мен сизга Раббингиздан оятлар-ишоратлар келтирдим: Мен лойдан Тайр кўринишида бир нарса яратаман, унга уфлайман, Аллоҳнинг изни ила у Тайр бўлади; кўр ва песни тузатаман; Аллоҳнинг изни ила ўликларни тирилтираман; уйларингизда нима еб, нима ғамлаганингизни сизга хабар бераман. Агар муминлар бўлсангиз, бунда сиз учун албатта ибрат-аломат бор”.
3:50. “Мендан олдинги Тавротни тасдиқлайман ва сизга ҳаром қилинган баъзи нарсаларни ҳалол қиламан”. Сизга Раббингиздан оят-ишорат келтирдим, Аллоҳга тақво қилинг, ва менга бўйсунинг!
3:51. Аллоҳ менинг ҳам Раббим, сизнинг ҳам Раббингиз; Унга қуллик/хизмат қилинг, Тўғри Йўл мана шу”.
3:52. Исо улардан куфрни ҳис этгач деди: “Аллоҳ йўлида ким менга ансор/ёрдамчилар бўлади?” Ҳаворийлар дедилар: “Биз Аллоҳнинг ансорларимиз; биз ишондик, гувоҳ бўл, биз мусулмонларданмиз/таслим бўлганларданмиз”.
3:53. Эй Раббимиз, Сенинг нозил қилганингга ишондик, Расулга эргашдик; бизни гувоҳлар билан бирга ёзгин!”
3:54. Улар тузоқ қурдилар, Аллоҳ ҳам тузоқ қурди. Тузоқ қурувчиларнинг яхшироғи Аллоҳ бўлди.
3:55. Эсланг, мана Аллоҳ деди: “Эй Исо, мен сенга вафо қиламан, сени ҳузуримда юксалтираман, кофир бўлганлардан сени поклайман ва сенга эргашганларни Қиёмат Кунигача кофирлардан олий қиламан. Сўнгра қайтишингиз ёлғиз Менга, сизнинг ихтилофга тушганингиз нарсалар борасида Ўзим ҳукм қиламан”.
3:56. Кофир бўлганларга эса дунёда ҳам, охиратда ҳам шиддатли азоб бераман, ёрдамчилардан ҳеч кими йўқ уларга.
3:57. Имон келтириб, солиҳ амал қилганларнинг эса эвазлари тўлиқ ўталади. Аллоҳ золимларни яхши кўрмайди.
3:58. Сенга Оятлардан ва Ҳикматли Зикрдан тиловат қилиб бераётганимиз ана шулар.
3:59. Аллоҳ наздида Исонинг мисоли, Одамнинг мисоли кабидир: Уни тупроқдан яратди, сўнгра “Бўл!” деди – бўлади.
3:60. Бу ҳаққ Раббинг ҳузуридан. Шу боис, асло иккиланувчи бўлма.
3:61. Сенга келган ушбу илмдан кейин ҳам, кимдир сен билан тортишса, сен айт: “Келинглар, ўғилларимизни ва ўғилларингизни, аёлларимизни ва аёлларингизни чақирайлик, ўзимиз ҳам сиз ўзингиз ҳам, ёлвориб дуо қилайликки, ёлғончиларга Аллоҳнинг лаънати бўлсин!”
3:62. Ҳақ тенг/мувофиқ жавоб мана шу. Аллоҳдан ўзга илоҳ йўқ. Аллоҳ Азиз ва Ҳаким /барча нарсага етарли қудрат ва ҳикмат эгаси.
3:63. Агар улар юз ўгирса, Аллоҳ бузғунчиларни Ўзи билади.
3:64. Айт: “Эй Аҳли Китоб! Сиз билан орамизда тенг Сўзга келайлик: “Ёлғиз Аллоҳга қуллик/хизмат қилайлик, Унга ҳеч нарсани шерик қўшмайлик; бир-биримизни Аллоҳдан ўзга Рабблар қилиб олмайлик”. Агар улар юз ўгирса, айт: “Гувоҳ бўлингки, биз мусулмонлармиз/таслим бўлганлармиз!”
3:65. Эй Аҳли Китоб! Нега Иброҳим ҳақида тортишасиз? Таврот ҳам, Инжил ҳам ундан кейин нозил бўлган. Ақл ишлатмайсизми?
3:66. Илмингиз бор нарсада-ку тортишдингиз, аммо илмингиз бўлмаган нарса ҳақида нега тортишасиз? Аллоҳ билади, сиз билмайсиз.
3:67. Иброҳим на яҳудий эди, на насроний эди, балки Ҳаниф/инсонлар уйдирган динларни рад этган Муслим/ёлғиз Аллоҳга таслим бўлган эди – Мушриклардан эмасди.
3:68. Ҳақиқат шуки, Иброҳимга энг яқинлар – унга тобеъ бўлганлар, мана шу Набий ва имон келтирганлардир. Аллоҳ – муминларнинг валийси/йўл кўрсатувчиси.
3:69. Аҳли Китобдан бир тоифа бор, сизни адаштиришни қаттиқ истайди. Улар фақат ўзларини/ўзаро бир-бирларини адаштиради, лекин сезмайди.
3:70. Эй Аҳли Китоб! Ўзингиз бунга гувоҳ бўла туриб, нега Аллоҳнинг оятларини/далилларини инкор этасиз?
3:71. Эй Аҳли Китоб! Нега ҳақиқатни ботил билан ўрайсиз ва била туриб ҳақиқатни яширасиз?
3:72. Аҳли Китобдан бир тоифа деди: “Имон келтирганларга нозил бўлган нарсани кун бошида тасдиқланг, охирида рад этинг, зора қайтсалар.
3:73. Сизнинг динингизга эргашганлардан бошқасига ишонманг”. Сен айт: “Тўғри Йўл бу – Аллоҳнинг кўрсатган Йўли. “Сизга берилганининг мисли бошқага ҳам берилса тасдиқ этманг, йўқса Раббингиз ҳузурида сиз билан ҳужжатлашадилар” дейишса, сен айт: “Фазл/ваҳй – Аллоҳнинг қўлида, истаганига беради”. Аллоҳ Восиъ Алим / кенг ва мўл бергувчи ва билгувчи.
3:74. Ўзи истаганини раҳматига хос қилади. Аллоҳ Улуғ Фазл Эгаси.
3:75. Аҳли Китобдан баъзилари борки, юклар-ла олтин омонат қолдирсанг ҳам, ўзингга қайтаради. Улардан баъзилари борки, бир динор берсанг ҳам, то бошида туриб олмагунча қайтармайди. Бунга сабаб – “Уммийлар ҳақида бизда ҳеч қандай жавобгарлик йўқ” дейишлари. Улар билиб туриб Аллоҳга қарши ёлғон гапиришади.
3:76. Йўқ, аксинча, ким омонатга вафо қилса, ва тақво қилса, Аллоҳ тақво эгаларини яхши кўради.
3:77. Аллоҳга берган аҳдини ва иймонларини оз эвазга сотаётганлар учун, ана ўшалар учун Охиратда ҳеч вақо йўқ, уларга Аллоҳ гапирмайди ҳам, Қиёмат куни уларга қарамайди/муҳлат бермайди ҳам, уларни покламайди ҳам, улар учун Аламли Азоб бор.
3:78. Улар орасида бир гуруҳ бор, Китобда бўлмаган нарсаларни Китобдан санашингиз учун, тилларини эгиб букади. Аллоҳнинг ҳузуридан бўлмаган нарсани “Бу Аллоҳнинг ҳузуридан” дейди. Улар билиб туриб Аллоҳга қарши ёлғон гапиришади.
3:79. Ҳеч бир башар, Аллоҳдан унга Китоб, Ҳукм/Ҳикмат ва Набийлик берилганидан кейин одамларга қарата: “Аллоҳдан бошқа менга ҳам қуллик/хизмат қилинг”, дейиши мумкин эмас; балки фақат шундай дейди: “Ўргатганингиз Китоб ва ундан ўрганганларингиз ила Раббонийлар/ўзини ёлғиз Раббига холис қилган қуллари бўлинг!”
3:80. “Малакларни ва Набийларни рабблар қилиб олинг!” дея сизга буюриши ҳам мумкин эмас. Сиз таслим бўлганингиздан кейин, кофирликни амр этадими сизга? (*Рабблар қилиб олинган Малаклардан – Аҳбор ва Руҳбонлар, Набийлардан – Исо Масиҳ. 9:31)
3:81. Аллоҳ, Набийлардан сўз олди: “Сизга Китобдан ва ҳикматдан бердим, сўнгра сиздагини тасдиқ этувчи Расул келганида, уни ишониб тасдиқ этасиз ва унга ёрдам берасиз!” Деди: “Қабул этдингизми? Мендан ушбу оғир юкни зиммангизга олдингизми?” Улар дедилар: “Қабул этдик!” Деди: “Гувоҳ бўлингки, Мен ҳам сиз билан бирга гувоҳман”.
3:82. Ким бундан кейин юз ўгирган бўлса, Фосиқлар/йўлдан озганлар ана ўшалардир.
3:83. Аллоҳнинг Динидан бошқани истайдиларми? Ҳолбуки Осмонлару-Ердаги барча истаса-истатмаса, Унга таслим бўлган ва Унга қайтарилади.
3:84. Айт: “Биз Аллоҳга имон келтирдик, ва бизга нозил бўлганини тасдиқ этиб ишондик; ҳамда Иброҳимга, Исмоилга, Исҳоққа, Йаъқубга ва уларнинг авлодларига нозил бўлганини ҳам; Мусога, Исога ва набийларга берилганини ҳам; улар орасида бирини бошқасидан айирмаймиз, ва Унинг Ўзига таслим бўлганмиз”.
3:85. Ким Исломдан бошқа дин истаса, ундан қабул этилмайди, ва Охиратда зиён кўрганлардан бўлади.
3:86. Аллоҳ бир қавмни қандай қилиб Тўғри Йўлга йўлласин, ахир уларга Расул аниқ далиллар келтирган бўлса, улар ҳам унинг ҳаққ эканига гувоҳ бўлган бўлса-ю, сўнг имонидан кейин кофир бўлиб кетса? Аллоҳ бундай золимларни Тўғри Йўлга йўлламайди.
3:87. Ана ўшаларнинг жазоси – устларига Аллоҳнинг, Малакларнинг ва барча одамларнинг лаънати.
3:88. Унда доимий қоладилар. Улардан Азоб енгиллатилмайди ҳам, уларга қаралмайди/муҳлат берилмайди ҳам.
3:89. Аммо ундан кейин тавба қилиб қайтганлар ва ислоҳ этиб тузатганлар мустасно. Ҳақиқатан Аллоҳ Ғафур Раҳим/ кечиргувчи, раҳмдил.
3:90. Имонларидан кейин кофир бўлганлар, сўнгра кофирлиги зиёда бўлганлар, уларнинг тавбалари/қайтишлари асло қабул этилмайди. Адашганлар ана ўшалар.
3:91. Кофир бўлиб ўлиб кетганларнинг ҳеч бири, агарчи дунё тўла олтин тўласа ҳам, олинмайди, ана ўшалар учун Аламли Азоб бор, ёрдамчилардан ҳеч ким йўқ уларга.
3:92. Ўзингиз яхши кўрган нарсалардан инфоқ этмай туриб, Бирр/Энг олий яхшиликларга эриша олмайсиз. Нима инфоқ этсангиз ҳам, Аллоҳ уни билиб туради.
3:93. Исроил ўғилларига барча егуликлар ҳалол эди, Таврот нозил қилинишидан олдин, Исроил ўзига ҳаром қилганидан бошқа. Айт: “Тавротни келтириб ўқинг, агар тўғри айтган бўлсангиз”.
3:94. Кимки бундан кейин ҳам Аллоҳга қарши ёлғон уйдирса, Золимлар ана ўшалар.
3:95. Айт: “Аллоҳ тўғри айтди”. Шундай экан, ҳаниф бўлган Иброҳиминг динига эргаш, у мушриклардан бўлмаган.
3:96. Ҳақиқат шуки, бу одамлар учун илк барпо этилган, оламлар/барча халқлар учун баракот манбаи, Тўғри Йўлни кўрсатувчи Байт/марказ Бакка’дагидир.
3:97. Унда Иброҳимнинг мақоми – сўз билан очиқ баён этилган далиллар – бор. Унга кирган омонликда бўлади. Аллоҳнинг бу ерли одамлар зиммасидаги ҳаққи – Йўлга кучи етганлар бу Байтни ҳаж қилишидир. Ким кофир бўлса/бу ҳаққни рад этса, Аллоҳ Ғаний /барча оламлардан беҳожат.
3:98. Айт: “Эй Аҳли Китоб! Нега Аллоҳнинг оятларини инкор этаяпсиз? Ахир Аллоҳ амалларингизга гувоҳ бўлиб турибди-ку!”
3:99. Айт: “Эй Аҳли Китоб! Имон келтирганларни нега Аллоҳнинг йўлидан тўсаяпсиз? Ўзингиз бунга гувоҳ бўла туриб, нега Аллоҳнинг Йўлини эгри кўрсатишга уринаяпсиз? Ахир Аллоҳ амалларингиздан ғофил/бехабар эмас-ку!”
3:100. Эй имон келтирганлар, агар Китоб берилганлардан бўлмиш гуруҳга бўйсинсангиз, имонингиздан кейин сизни кофирликка қайтаради.
3:101. Сизга Аллоҳнинг оятлари ўқилмоқда экан, ва орангизда Унинг юборган Расули бор экан, қандай қилиб кофирликка қайтасиз? Ким Аллоҳга маҳкам боғланса, Тўғри Йўлга йўлланади.
3:102. Эй имон келтирганлар! Аллоҳга чин қўрқув ила тақво қилинг, ўлим келмай туриб, Унга таслим бўлинг.
3:103. Аллоҳнинг туширган арқонига барчангиз бирлашинг, ва тафриқага тушиб айрилманг; Аллоҳнинг сизга неъматини ёдда тутинг: эсланг, ўзаро душман эдингиз, У кўнгилларингизни улфат қилди – Унинг неъмати туфайли ака-ука бўлдингиз. Сиз оловли бир чуқур лабига келиб қолган эдингиз, У сизни қутқарди. Тўғри Йўлда бўлишингиз учун, Аллоҳ сизга Ўз оятларини ана шундай баён қилиб бермоқда.
3:104. Сиздан маъруфга чорловчи, мункардан қайтарувчи уммат/жамоа бўлсин; нажот топгувчилар/муродига етувчилар ана ўшалар.
3:105. Аниқ баён қилинган далиллар келганидан кейин ҳам, тафриқа ва ихтилофга тушганлар каби бўлманг. Ана ўшаларга Улуғ Азоб бор.
3:106. Кун келиб, баъзи юзлар ёруғ, баъзи юзлар қаро бўлади. Юзи қароларга: “Имонингиз ортидан кофир бўлганмидингиз? Кофир бўлганингиз билан тотинг шу азобни!”
3:107. Ёруғ юзлар эса, Ана ўшалар Аллоҳнинг раҳматига дохил бўлади, у ерда доимий қолади.
3:108. Булар – Аллоҳнинг оятлари. Уларни сенга ҳаққи ила/ маъно ва мақсадига мувофиқ ўқиб бермоқдамиз. Аллоҳ оламларнинг ҳеч бирига ноҳақликни ирода этмайди.
3:109. Осмонлар ва Ердаги борлиқ Аллоҳнинг. Барча ишлар ёлғиз Аллоҳга қайтарилади.
3:110. Одамлар учун чиқарилган умматнинг яхшиси бўлдингиз – Аллоҳга имон келтирасиз, маъруфга буюрасиз, мункардан қайтарасиз. Аҳли Китоб имон келтирганида эди, ўзлари учун яхши эди. Улар орасида муминлар бор, аммо кўплари фосиқлар/йўлдан озганлар.
3:111. Сизга азиятдан ортиқ ҳеч бир зарар етказа олмаслар. Сизга қарши урушсалар, орқасини ўгириб қочадилар, сўнг уларга ёрдам берилмайди.
3:112. Аллоҳдан ва одамлардан бўлмиш арқонни/аҳдни тутганларидан ташқари, қаерда бўлмасинлар, зиллат тамғаси урилади уларга. Улар Аллоҳнинг ғазабига дучор бўлдилар ва устларига мискинлик тамғаси урилди. Ана шундай, зеро улар Аллоҳнинг оятларига кофир бўлишарди, ва набийларни ноҳақ қатл этишарди. Ана шундай, зеро улар осий ва ҳаддидан ошганлар эди.
3:113. Ҳаммаси ҳам бир хил эмас. Аҳли Китоб орасида Тўғри Йўлда қоим бўлган бир жамоа бор, улар тўлиқ бўйсунган ҳолларида, узун тунлари Аллоҳнинг оятларини тиловат қилади.
3:114. Улар, Аллоҳга ва Охират кунига ишонади, маъруфга буюради, мункардан қайтаради; яхшиликларга шошилади, солиҳлар ана ўшалар дир.
3:115. Қандай яхшилик қилсалар ҳам, асло куфрга йўлиқмайди/ажр-мукофотсиз қолдирилмайди. Аллоҳ тақво эгаларини билади.
3:116. Кофир бўлганларга, на моллари, на авлодлари, Аллоҳга қарши фойда бермайди. Улар Олов аҳлидир; у ердан асло чиқмайдилар.
3:117. Уларнинг дунё ҳаётида сарфлаган моллари, бамисоли ўзларига зулм қилган бир қавмнинг экинини уриб, маҳв этган музлатувчи шамолга ўхшайди. Аллоҳ уларга ноҳақлик қилмади; улар ўз-ўзларига ноҳақлик қилиб келган эдилар.
3:118. Эй имон келтирганлар! Ўзингиздан бошқани сирдош қилиб олманг; улар сизни тойдириш йўлидан асло воз кечмаслар. Сизга азият берувчи нарсаларни жуда истайдилар. Уларнинг оғизларидан ғазаб тўлиб-тошади. Дилларида яширганлари яна-да каттароқ. Сизга оятларни очиқ баён этдик, агар ақл ишлатсангиз.
3:119. Мана, сиз уларни хуш кўрасиз, ҳолбуки улар сизни хуш кўрмайдилар. Китобга тўлиғича ишонасиз, улар эса сизни учратганида, “Имон келтирганмиз” дейдилар, аммо ўзлари холий қолганларида, сизга қарши нафратдан қўлларини тишлайдилар. Айт: “Ғазабдан ўлиб кетинг! Шубҳасиз Аллоҳ, диллардагини билади”.
3:120. Сизга бир яхшилик етса, уларга ёмонлик бўлади; сизга бир ёмонлик етса, унга севинадилар. Агар сабр қилсангиз ва тақво қилсангиз, уларнинг макри/тузоғи сизга зарар беролмайди. Аллоҳ уларнинг барча қилмишларини иҳота қилади/ўраб олади.
3:121. Эсла, сен эрта тонгда аҳлингдан айрилдинг, муминларни уруш жойларига турғизаётгандинг. Аллоҳ Самиъ Алим /эшитгувчи ва билгувчи.
3:122. Мана, сиздан икки гуруҳ, валийлари Аллоҳ бўла туриб, қўрқиб айний бошлади. Муминлар, ёлғиз Аллоҳга суянсинлар.
3:123. Аллоҳ Бадрда сизга ёрдам берди, сиз заиф ва кучсиз эдингиз. Бунинг шукрини адо этиш учун, Аллоҳга тақво қилинг.
3:124. Эсла, сен муминларга демоқдасан: “Раббингиз уч минг Малак нозил қилиб, сизга мадад бериши етарли эмасми?”
3:125. Ҳа! Мабодо ҳозир устингизга бостириб келсалар ҳам, агар сабр ва тақво қилсангиз, Раббингиз сизга нишонли беш минг малак-ла мадад беради.
3:126. Аллоҳ фақат сизга хушхабар бўлсин ва қалбларингиз таскин топиши учун шундай қилди, Нусрат/ғалабага элтувчи ёрдам фақат Азиз Ҳаким Аллоҳ тарафидан/куч-қудрат ва ҳикмат/ҳукм эгаси.
3:127. Ҳамда кофирларнинг бир қисми узилсин, паришон ва ноумид ҳолда қайтишлари учун шундай қилди.
3:128. Бунда сенга қолган иш йўқ – Аллоҳ Ўзи тавбаларини қабул қилади, ёки золим бўлганлари боис уларни азоблайди.
3:129. Осмонлару-Ерда борлиқ Аллоҳннг. Истаганини кечиради, истаганига азоб беради, Аллоҳ Ғафур Раҳим / кечиримли раҳмдил.
3:130. Эй имон келтирганлар, устма-уст рибо еманглар, нажот топмоқ учун Аллоҳга тақво қилинг.
3:131. Кофирлар учун ҳозирланган оловдан эҳтиёт бўлинг!
3:132. Сизга раҳм қилиниши учун, Аллоҳга ва Расулга бўйсунинг.
3:133. Раббингиздан бўлган кечиримга ошиқинг; кенглиги Осмонлару-Ерга тенг бўлган жаннатга ошиқинг, у тақво эгалари учун ҳозирланган.
3:134. Улар тўқчиликда ҳам, йўқчиликда ҳам инфоқ қиладиган, ғазабларини ютадиган, ва одамларни кечирадиган кишилардир. Аллоҳ яхшилик қилувчиларни яхши кўради.
3:135. Қачонки бирор бузуқлик ёки ўзларига жабр қилсалар, Аллоҳни ёдга оладилар ва гуноҳларига кечирим истайдилар; гуноҳларни Аллоҳдан ўзга ким ҳам кечира олади? Улар билиб туриб, хатоларида қайсарлик этмайдилар.
3:136. Ана ўшаларнинг ажр-мукофоти Рабби тарафидан кечирим ва остларидан анҳорлар оққан боғ-роғлар, у ерда доимий қоладилар. Амал қилганларнинг мукофоти қанчалар яхши!
3:137. Сиздан олдин ҳам суннатлар/олдингиларнинг йўллари ўтган. Ер юзини кезинг, ёлғон санаганларнинг оқибати қандай бўлганига назар солинг.
3:138. Бу – одамлар учун баён/очиқлов, тақво эгалари учун тўғри йўл ва мавъиза/ўгитдир.
3:139. Сустлашманг, маҳзун бўлманг, агар мумин бўлсангиз, устун бўлгувчи сиз бўласиз.
3:140. Агар сизга жароҳат етган бўлса, нариги қавмга ҳам ўхшаш жароҳат етганди. Ана шундай, Биз бу кунларни/даврларни одамлар орасида алмаштириб турамиз, токи Аллоҳ кимнинг ўз имонига содиқ эканини маълум қилсин, ҳамда орангиздан шаҳидларни олсин, Аллоҳ золимларни яхши кўрмайди,
3:141. Ҳамда имон келтирганларнинг сафларини покласин, кофирларни маҳв этсин.
3:142. Йўқса сиз, орангизда жидду-жаҳд қилганларни ва сабр этганларни Аллоҳ Ўзи маълум қилмай туриб, жаннатга кирамиз, деб ўйладингизми?
3:143. Сиз ўлим билан юзма-юз келишдан олдин, ўлишни орзу қилардингиз. Мана уни кўриб, қараб турибсиз.
3:144. Муҳаммад бир Расул холос, ундан олдин ҳам Расуллар ўтган. Энди агар у ўлса ёки ўлдирилса, ортингизга қайтиб кетасизми? Ким ортига қайтиб кетса, Аллоҳга ҳеч қандай зиён етказолмайди. Аллоҳ шукур қилгувчиларнинг эвазини жуда тез ўтайди.
3:145. Аллоҳнинг изнисиз/қонунларидан ташқари, ҳеч бир жонга ўлим етмайди. Вақти-соати ўлчанган қонуният бу. Ким дунё эвазини истаса, унга ундан берамиз; ким охират эвазини истаса, унга ундан берамиз, шукур қилгувчиларнинг эвазини жуда тез ўтаймиз.
3:146. Қанча-қанча Набийлар ўтганки, у билан кўплаб Раббонийлар/ўзини ёлғиз Раббига холис қилган қуллар биргаликда жанг қилган; Аллоҳ йўлида келган мусибатлардан асло бўшашмадилар, заифлашмадилар, бўйин эгмадилар. Аллоҳ сабр эгаларини яхши кўради.
3:147. Уларнинг сўзлари фақат шу бўлган: “Эй Раббимиз, гуноҳларимизни ва ишимиздаги нуқсонларимизни мағфират айла, қадамимизни собит айла, кофирларга қарши бизга нусрат/ғалабага элтувчи ёрдам бергин!”
3:148. Аллоҳ уларгa дунё эвазини ҳам, охиратдаги энг гўзал эвазни ҳам берди. Зеро Аллоҳ яхшилик қилувчиларни/чиройли амал қилгувчиларни яхши кўради.
3:149. Эй имон келтирганлар! Агар кофир бўлганларга бўйсунсангиз, сизни ортингизга қайтаради, ўшанда зиёнда қоласиз/бой берасиз.
3:150. Йўқ, сизнинг Мавлоингиз/мададкорингиз ёлғиз Аллоҳдир! Нусрат/Ёрдам бергувчиларнинг яхшиси Унинг Ўзи.
3:151. Кофирларнинг юрагига қўрқув соламиз, зеро улар ҳеч бир далил нозил қилинмаган нарсаларни Аллоҳга шерик қўшдилар. Уларнинг борар жойи олов! Золимларнинг сўнгги манзили қанчалар ёмон!
3:152. Аллоҳ сизга берган ваъдасини ростга чиқарди – эсланг, Унинг изни ила сиз уларни сезиб турган эдингиз. Ниҳоят, қўрқувга тушдингиз, қилинадиган ишда тортиша бошладингиз, кейин яхши кўрган нарсангизни кўриб (3:143), исён этдингиз. Орангизда биров дунёни истаётган, биров охиратни истаётган эди. Сўнгра синаш учун Аллоҳ Ўзи уларни ортига қайтарди/сизни улардан узоқлаштирди, сизни авф этиб бўлганди. Аллоҳ муминларга нисбатан фазл-карам эгаси.
3:153. Эсланг, ортингизда Расул сизни чорламоқда, сиз ҳеч кимга қарамай қочаяпсиз. Шу боис Аллоҳ, сизга ғам устига ғам бердики, на қўлдан кетганига, ва на бошингизга келганига маҳзун бўлмагайсиз. Аллоҳ қилаётган ишларингиздан хабардор.
3:154. Сўнгра ғам ортидан сизга бир хотиржамлик берди, бир қисмингизни уйқу босди; бир қисмингиз эса ўз жонининг ташвишига тушиб қолди – Аллоҳ ҳақида ботил жоҳилият гумонларини қила бошлади. “Бу ишдан бирон нима борми бизга?” дейишарди. Сен айт: “Бу иш тамоман Аллоҳнинг”. Уларнинг ичда яшириб, сендан сақлагани бор. Улар дейишади: “Бу ишдан бизга бирон нафъ бўлганида, бу ерда ўлиб кетмасдик”. Сен айт: “Уйингизда қолсангиз ҳам, зиммасига ўлим ёзилганлар барибир ётар жойини топарди”. Аллоҳ диллардагини синаши, ва қалблардагини чиқариши учун шундай. Аллоҳ диллардагини билгувчи.
3:155. Икки гуруҳ тўқнашган кунда, орангиздаги юз ўгириб кетганларни, қилган баъзи қилмишлари сабабли шайтон/йўлдан оздирувчи тойдирмоқ истаган эди. Аллоҳ уларни авф айлади. Ҳақиқатан Аллоҳ Ғафур Ҳалим / кечиримли ва юмшоқ муомала қилгувчи.
3:156. Эй имон келтирганлар! Кофир бўлганлар каби бўлманг, ва Ер юзида чиққан ва ғозий бўлган оға-инилари ҳақида: “Агар ёнимизда бўлсалар, ўлишмасди ва ўлдирилмасди” дейдиганлар каби бўлманг. Аллоҳ буни уларнинг қалбларида ҳасрат қилади. Ҳаётни ҳам, ўлимни ҳам Аллоҳ беради. Аллоҳ сизнинг қилаётган амалларингизни кўриб туради.
3:157. Агар Аллоҳ йўлида ўлсангиз ёки ўлдирилсангиз, ҳақиқат шуки, Аллоҳнинг кечириши ва раҳм қилиши, уларнинг ғамлаганидан яхшироқ.
3:158. Ҳақиқат шуки, ўлсангиз ҳам, ўлдирилсангиз ҳам, ёлғиз Аллоҳнинг ҳузурига тўпланасиз!
3:159. Аллоҳнинг раҳмати ила, сен уларгa юмшоқ муомала қилдинг (3:155). Агар қўпол, қаттиқ юракли бўлганингда, атрофингдан тарқаб кетган бўлишарди. Шундай экан, уларни авф эт/уларнинг қусурларини юзига солма, улар учун кечирим иста: Амрда/иш юритишда улар билан машварат қил. Қарор олгач эса, Аллоҳга суян/таваккал қил, зеро Аллоҳ таваккал қилгувчиларни яхши кўради.
3:160. Агар Аллоҳ сизга нусрат/ғалабага элтувчи ёрдам берса, сизга ҳеч ким ғолиб бўлолмайди. Агар сизни нусратсиз/ғалабага элтувчи ёрдамсиз ташлаб қўйса, ундан сўнг сизга ким ҳам нусрат/ёрдам беради? Муминлар ёлғиз Аллоҳга суянсинлар.
3:161. Бир Набий Омонатга/Ижтимоий мол-мулкка хиёнат қилиши мумкин эмас/ҳаққидан ортиғини олиши мумкин эмас. Кимки Омонатга/Ижтимоий мол-мулкка хиёнат қилса, Қиёмат кунига ўз хиёнати билан келади. Сўнгра ҳар бир жоннинг қозонгани тўлиқ берилади, асло ноҳақлик қилинмайди.
3:162. Аллоҳнинг ризосига тобеъ бўлган кимса; Аллоҳнинг ғазабига учраган, борар жойи жаҳаннам бўлган кимса каби бўладими? Қанчалар ёмон борар жой у!
3:163. Улар Аллоҳ ҳузурида фарқли даражотларда, Аллоҳ уларнинг қилаётган амалларини кўриб туради.
3:164. Аллоҳ муминларга ўз яхшилигини эслатди: эсланг, ўз ораларидан Расул чиқарди, у уларга Унинг оятларини тиловат қилиб беради, уларни поклайди, уларга Китобни ва Ҳикматни ўргатади. Бундан олдин улар очиқ адашувда/хато йўлда эдилар.
3:165. Сизга бир мусибат етганида – сиз унинг икки мислини уларга етказган бўлсангиз ҳам – “Бу қаердан/қанақаси?” дедингиз. Сен айт: “Бу ўз нафсларингиздан”. Аллоҳ барча нарсага қодир/барча нарсанинг ўлчовини белгилаб қўйган.
3:166. Икки жамоа тўқнашган кунда, сизга мусибат етиши, фақат Аллоҳнинг изни ила/ўзгармас қонуниятига кўра, ҳамда ким мумин эканини маълум қилиш учундир,
3:167. Нифоқ қилувчиларни маълум қилиши учун ҳамдир. Қачонки уларга: “Келинг, Аллоҳ йўлида жанг қилинг, ёки ўзингизни мудофаа қилинг”, дейилганда: “Агар бирор жанг бўлишини билганимизда, сизларга эргашган бўлардик” дейишди. Улар, у кунда, қалбларида бўлмаганини оғзида айтмоқда эдилар, имондан кўра куфрга яқинроқ эдилар. Аллоҳ уларнинг нималар сақлаганини яхшироқ билади.
3:168. Ўтириб қолиб, оға-иниларига: “Бизнинг айтганимизни қилганларида, ўлдирилмас эдилар” деганларга айт: “Рост бўлса, қани ўлимни ўзингиздан даф этинг-чи!”
3:169. Аллоҳ йўлида ўлдирилганларни ўликлар санама; Йўқ, улар тирик. Уларга Рабби ҳузурида ризқ берилади.
3:170. Аллоҳнинг Ўз фазлидан бергани ила севинадилар. Ортларидан келгувчи, аммо ҳали етишмаганларга ушбу муждани берадиларки, уларга ҳеч қандай хавф йўқ, улар маҳзун бўлмайдилар –
3:171. Аллоҳнинг неъмати ва фазли ила, ҳамда Аллоҳ муминларнинг ажр-мукофотини зое қилмаслиги билан севинадилар.
3:172. Улар – жароҳат олганларидан кейин ҳам Аллоҳ ва Расулининг чақириғига (3:153) ижобат этган зотлардир. Улар орасида яхшилик қилувчилар ва тақво эгалари учун Улуғ Ажр-мукофотлар бор.
3:173. Уларга одамлар дейишди: “Одамлар сизга қарши тўпланишди! Қўрқинглар!”, уларнинг эса иймони яна-да зиёда бўлди, ва дедилар: “Бизга Аллоҳнинг Ўзи етарли, У қандай ҳам яхши Вакил”.
3:174. Шу боис, Аллоҳдан неъмат ва фазл ила қайтдилар, уларга ҳеч бир ёмонлик етмади. Улар Аллоҳнинг ризосига тобеъ бўлдилар. Аллоҳ – улуғ фазл эгаси.
3:175. Ана сизга шайтон! У фақат ўз валийларини қўрқитади, бас, улардан қўрқманг, ёлғиз Мендан қўрқинг, агар мумин бўлсангиз!
3:176. Куфр ичра югуриб-елувчилар сени хафа қилмасин, улар Аллоҳга ҳеч қандай зарар беролмайдилар. Аллоҳ Охиратда улар учун ҳеч бир насиба қолдирмасликни истамоқда. Уларга Улуғ Азоб бор.
3:177. Имондан воз кечиб, ўрнига куфрни сотиб олганлар, Аллоҳга ҳеч қандай зарар беролмайдилар. Уларга Аламли Азоб бор.
3:178. Кофир бўлганлар, уларга муҳлат беришимизни, ўзлари учун яхшилик санамасинлар. Биз уларгa муҳлат беряпмиз, токи гуноҳлари зиёда бўлсин, улар учун Хорловчи Азоб бор.
3:179. Сиз тушган вазиятда Аллоҳ муминларни ташлаб қўймайди, балки покни нопокдан айиради. Аллоҳ сизни ғайбга воқиф қилмайди, фақатгина Расуллари орасидан Ўзи истаганини танлайди бунга. Шундай экан, Аллоҳга ва Расулларига ишонинг; агар ишонсангиз ва тақво қилсангиз, сиз учун улуғ ажр-мукофот бор.
3:180. Аллоҳ Ўз фазлидан берганига бахиллик қилувчилар, буни ўзлари учун яхшилик санамасин, аксинча, бу улар учун ёмонликдир. Бахиллик қилганлари, Қиёмат куни бўйинларига чирмашиб ўралади. Осмонлару-Ернинг мероси ёлғиз Аллоҳнинг. Аллоҳ сизнинг қилаётган ишларингиздан тўлиқ хабардор.
3:181. “Аллоҳ фақир, биз боймиз” деганларнинг гап-сўзларини Аллоҳ эшитиб турган эди. Уларнинг гап-сўзларини ҳам, набийларни ноҳақ ўлдиришларини ҳам ёзиб қайд этиб қўямиз, ва ҳали деймизки: “Тотинг энди куйдирувчи азобни!”
3:182. Булар сизнинг ўз қўлингиз билан тақдим этганларингиз. Аллоҳ қулларга ноҳақлик қилмайди.
3:183. Улар дедилар: “Аллоҳ биздан олган Аҳдига кўра, ўтда ёниб кетадиган бирор қурбон келтирмагунича, ҳеч қанақа Расулга ишонмаймиз”. Сен айт: “Сизга мендан олдин очиқ-ойдин далиллар ва сизнинг айтганингизни келтирган Расуллар келган эди. Гапингиз рост бўлса, нега уларни ўлдирдингиз?”
3:184. Агар сени ёлғончига чиқарсалар, сендан олдин ҳам очиқ-ойдин далиллар, ҳикматли саҳифалар ва йўлни ёритгувчи Китоб билан келган Расулларни ёлғончига чиқарганлар.
3:185. Ҳар бир жон ўлимни тотгувчидир. Лойиқ бўлган эвазингиз Қиёмат куни сизга тўлиқ берилади. Кимда-ким оловдан халос қилиниб, жаннат боғларига киритилса, ютуққа эришибди. Дунё ҳаёти, алдагувчи бир завқдан ўзга нарса эмас.
3:186. Мол ва жонингизда синов қилинасиз; сиздан олдин Китоб берилганлар ва Аллоҳга шерик қўшганлардан кўплаб азиятлар эшитасиз. Агар сабр қилсангиз, тақво қилсангиз, энг қатъиятли ишлар ана шулардир.
3:187. Эсланг, Китоб берилганлардан Аллоҳ аҳд олди: “Уни одамларга баён қиласиз/очиқ етказасиз, беркитмайсиз/яширмайсиз!” Бироқ улар уни ортларига ташладилар, ва арзимас эвазга сотдилар. Сотиб олган эвазлари қанчалар ёмон!
3:188. Қилмишидан қувонган, ва қилмагани билан мақтанишни хуш кўрганларни ҳаргиз Азобдан омонда деб ўйлама. Улар учун Аламли Азоб бор.
3:189. Осмонлару-Ернинг мулки Аллоҳнинг. Аллоҳ барча нарсага қодир/барча нарсанинг ўлчовини белгилаган Зот.
3:190. Осмонлару-Ернинг яратилишида, Кеча ва Кундузнинг алмашинувида, ақл эгалари учун оятлар/ишоратлар бор.
3:191. Улар турганда ҳам, ўтирганда, ёнбошлаганда ҳам Аллоҳни ёд этадилар, Осмонлару-Ернинг яратилиши ҳақида тафаккур қиладилар: “Эй Раббимиз, Сен буларни беҳудага яратган эмассан, Сен беҳуда яратишдан Пок ва Олийсан, бизни Олов Азобидан сақлагин!”
3:192. “Эй Раббимиз! Кимни Оловга ташласанг, уни ҳақиқатан хор қилибсан. Бундай золимларга ёрдамчи йўқ”.
3:193. “Эй Раббимиз! Биз “Раббингизга ишонинг” деган Нидочининг нидосини эшитдик ва ишондик. Эй Раббимиз, гуноҳларимизни кечиргин, ёмонликларимизни яширгин, бизни яхшилар билан бирга жонимизни олгин/ажримизни тўлиқ бергин!”
3:194. “Эй Раббимиз! Расулларингга ваъда қилганингни бизга ҳам насиб этгин, Қиёмат куни бизни шарманда қилмагин. Сен ваъдангга хилоф қилмайсан!”
3:195. Рабби улардан қабул айлади: “Мен сиздан ҳеч бир эркагу-аёлнинг амалини зое қилмайман, сиз бир-бирингиздансиз. Ҳижрат этган, юртларидан чиқарилган, Менинг йўлимда азият чеккан, жанг қилган ва жон берганларнинг айбларини беркитаман ва уларни остларидан анҳорлар оққан боғ-роғларга киритаман”. Бу Аллоҳдан ажр-мукофотдир. Ажр-мукофотларнинг энг гўзали Аллоҳнинг ҳузурида.
3:196. Кофир бўлганларнинг шаҳарма-шаҳар кезишлари сени алдаб қўймасин.
3:197. Бироз фойдаланиш/баҳраманд бўлиш бу холос. Сўнгра борар жойлари жаҳаннам. Қанчалар ёмон жой!
3:198. Лекин Раббига тақво қилганлар учун, остларидан анҳорлар оққан боғ-роғлар бор. У ерда доимо қоладилар. Аллоҳ тарафидан меҳмон қилинадилар. Аллоҳнинг ҳузуридаги ажр-мукофотлар, яхшилар учун яхшироқ.
3:199. Аҳли Китоб орасида, Аллоҳга имон келтирган, сизга нозил қилинган ва ўзларига нозил қилинганга ишонган; Аллоҳдан хушуъ ила қўрқадиган; Аллоҳнинг оятларини арзимас эвазга сотмайдиган зотлар бор. Ана ўшаларнинг эвази Рабби ҳузурида! Ҳеч шубҳасиз, Аллоҳнинг ҳисоб қилиши ўта тез.
3:200. Эй имон келтирганлар, сабр қилинг, сабрда устун келинг. Курашга доим ҳозир ва хушёр туринг. Нажот топмоқ/муродга етмоқ учун Аллоҳга тақво қилинг!
