Раҳмон ва Раҳим Аллоҳнинг исми билан (1:1)
14:1. Алиф Лом Ро. Бу Бизнинг сенга нозил қилганимиз Китоб/Қонун, токи одамларни Раббининг изни ила Зулматлардан Нур сари – Азиз ва Ҳамид Зотнинг Йўли сари олиб чиққайсан/куч-қудрат эгаси ва барча мақтовларга лойиқ Зотнинг.
14:2. Осмонлару-Ердаги барча нарса Унинг бўлган Аллоҳнинг Йўлига. Шиддатли Азобдан нонкўр/кофирларнинг ҳолига вой!
14:3. Улар Дунё ҳаётини Охиратдан афзал кўрадиган, ва Аллоҳнинг йўлига тўсиқ бўладиган ва унинг эгри бўлишини истайдиган кишилар. Ана ўшалар узоқ адашувда.
14:4. Ҳар бир Расулни фақат ўз қавмининг тилида юбордик, токи уларга очиқ-ойдин баён қилсин. Аллоҳ Ўзи истаганини адаштиради, Ўзи истаганини йўлга солади. Азиз ва Ҳаким Унинг Ўзидир /барча нарсани Ўзи куч-қудрати билан яратади, қонунини ўрнатади ва Охиратда Ҳукм қилади.
14:5. Мусони ҳам ушбу оятларимиз-ла юборган эдик: “Қавмингни зулматлардан нур сари чиқаргин, уларга Аллоҳнинг кунларини эслатгин”. (3:140) Ҳар бир сабр ва шукр қилувчи учун бунда оят-ишоратлар бор.
14:6. Мана Мусо қавмига деди: “Аллоҳнинг сизга берган неъматини эсланг. У сизни азобларнинг ёмонига солаётган, ўғилларингни сўйиб, аёлларингизни тирик/уятли аҳволда қолдираётган Фиръавн хонадонидан қутқарди. Раббингиздан сизга улкан синов бор эди бунда.
14:7. Мана Раббингиз сизга эълон қилди: “Агар шукур қилсангиз, сизга яна-да зиёда қиламан, агар нонкўрлик қилсангиз, Менинг азобим шиддатли”.
14:8. Мусо деди: “Агар сиз ва Ер юзидаги барча одамлар инкор этса ҳам, Аллоҳ Ғаний ва Ҳамид / бой-беҳожат ва мақтовга лойиқ”.
14:9. Сиздан олдин ўтганларнинг хабари келмадими? Нуҳ, Од ва Самуд хабари? – Улардан кейингилар ёлғиз Аллоҳга маълум – Уларга ўз ораларидан чиққан Расуллар очиқ баён қилинган оят-далиллар билан келган эди, улар эса қўлларини оғизларига қўйиб, дедилар: “Биз сиз келтирган Рисолатни тан олмаймиз, бизни чақираётганларингиз ҳақида шубҳадамиз”.
14:10. Расуллар деди: “Осмонлару-Ерни йўқдан бор этган/уларнинг фитратини ўрнатган Аллоҳ сизни гуноҳларингиздан кечиришга, ва маълум муддат кечиктиришга чақирмоқда, наҳотки Ундан шубҳада бўлсангиз?” Улар дедилар: “Сиз ҳам бизга ўхшаган башар/оддий одамларсиз. Сиз бизнинг ота-боболаримиз қуллик/хизмат қилиб келган нарсалардан тўсмоқчисиз. Акс ҳолда очиқ-ойдин илоҳий далил/исбот келтиринг!”
14:11. Расуллар уларга деди: “Ҳа, биз ҳам сизлар каби башар/оддий инсонлармиз. Аммо Аллоҳ Ўз қулларидан хоҳлаганига неъмат беради. Биз Аллоҳнинг нозил қилганидан бошқа бирор оят-ишорат келтира олмаймиз. Муминлар ёлғиз Аллоҳга суянсинлар”.
14:12. Нега Аллоҳга суянмас эканмиз, ахир Аллоҳ Ўзи бизга йўлларимизни кўрсатиб берган бўлса? Сизлардан етган азиятларга сабр қиламиз. Кучли таянч истаганлар ёлғиз Аллоҳга суянсинлар/таваккал қилсинлар.
14:13. Кофир бўлганлар Расулларга қарата деди: “Ё сизларни юртимиздан чиқарамиз, ё динимизга қайтасизлар”. Рабби уларга ваҳй қилди: “Биз бу Золимларни ҳалок қиламиз”. (*Юртдан чиқариш Ражм/бадарға маъносида – 7:88)
14:14. Улардан кейин Ер юзини сизларга маскан қилиб берамиз. Бу ваъда фақат Менинг мақомимдан хайиқадиган ва ваъидимдан хавф туйган кишилар учун*. (*Аллоҳнинг мақоми – Дин Кунининг Подшоҳи мақоми; ваъид – қўрқув билан олдиндан огоҳлантириш)
14:15. Улар ғалаба/фатҳ сўрадилар; Ҳар бир ўжар золим йиқилди –
14:16. ортида эса Жаҳаннам бор, унда йирингли сувдан ичирилади,
14:17. ундан ютишга чиранади-ю, томоғидан ўтказа олмайди, ҳар томондан ўлим келади-ю, ўла олмайди, бунинг ортида ҳали яна-да аччиқ азоблар бор.
14:18. Раббига кофир бўлганларнинг мисоли: уларнинг ишлари бамисоли бўронли кунда шамол учирган кул кабидир. Улар қийналиб интилганидан ҳеч нимага эга бўлолмайди. Узоқ Адашув ана ўша.
14:19. Аллоҳ Осмонлару-Ерни ҳаққ ила яратганини кўрмадингми? Агар хоҳласа, сизларни кетказиб, янги халқ келтира олади.
14:20. Бу Аллоҳ учун қийин эмас.
14:21. Барчалари Аллоҳнинг ҳузурига чиқадилар. Бечоралар Кибр қилганларга деди: “Биз сизга эргашган эдик. Аллоҳнинг азобидан бирон нарсани биздан кетказа оласизми?” Улар дедилар: “Агар Аллоҳ бизга йўл кўрсатганида эди, сизга ҳам йўл кўрсатган бўлардик. Энди нолиймизми, сабр қиламизми, қочадиган жойимиз йўқ”.
14:22. Бу Иш битгач, Шайтон деди: “Аллоҳ сизларга ҳақ ваъда қилган эди. Мен ҳам ваъда қилдим, аммо ваъдамни буздим. Сизни мажбурлашга куч-қудратим йўқ эди. Мен бор-йўғи чорладим, Сиз эса чопиб келдингиз. Энди мени эмас, ўзингни маломат қилинг! Мен сизни қутқара олмайман, сиз ҳам мени қутқара олмайсиз! Сизлар мени шерик қўшишингизни олдин ҳам рад этганман ҳозир ҳам”. Ҳақиқатан, Аламли Азоб мана шу золимлар учун.
14:23. Имон келтирган ва солиҳ амал қилиб ўтганлар, остидан анҳорлар оққан боғ-роғларга киритилади, ва унда Раббининг изни ила доимо қоладилар, Уларнинг дил сўзлари – “Тинчлик/Омонлик!”
14:24. Аллоҳ қандай мисол келтиришини кўрмадингми: Покиза Сўз бамисоли покиза дарахт каби – илдизи собит, шохлари Самода.
14:25. Раббининг изни ила ҳар доим мевасини бераверади. Одамлар ўгит-ибрат олсинлар, дея Аллоҳ бу мисолларни келтиради.
14:26. Нопок Сўзнинг мисоли эса, худди илдизи ердан қўпорилган ва субутсиз қуриган дарахт кабидир.
14:27. Муминларни Аллоҳнинг Ўзи бу дунё ҳаётида ҳам, Охиратда ҳам Собит Сўз ила собит айлайди, золимларни адаштиради. Аллоҳ Ўзи иродасини мудом рўёбга чиқаради.
14:28. Аллоҳнинг неъматини нонкўрликка алмашган, ва қавмларини адашув сари етаклаганларни кўрмадингми?
14:29. Яъни Жаҳаннам сари? Унда ёнадилар ҳали. Қанчалар ёмон манзил бу!
14:30. Аллоҳнинг йўлидан адаштириш учун унга шериклар пайдо қилдилар. Сен айт: “Баҳраманд бўлиб туринг, кейинроқ жамланиш жойингиз Жаҳаннам сари”.
14:31. Имон келтирган қулларимга айт, ҳеч қандай савдо-сотиқ ёки дўстлик бўлмаган Кун келишидан олдин, Салотни қоим қилсинлар/Кўрсатилган Йўлга эргашсинлар ва Биз берган ризқдан яширин ва ошкор инфоқ этсинлар.
14:32. Аллоҳ – Осмонлару-Ерни яратган, самодан сув туширган, ва у билан ҳосиллар чиқариб сизларга ризқ қилиб берган, Унинг амри билан денгизда сузиб юриши учун кемани сизга бўйсундирган, ва дарёларни ҳам сизга бўйсундирган Зотдир.
14:33. Қуёш ва Ойни ҳам сизнинг ҳожатингизга яроқли тарзда доимий ҳаракатга солиб қўйган, Кеча ва Кундузни ҳам сизга бўйсундириб қўйган,
14:34. Ва сиз нимаики истаган/сўраган бўлсангиз, ҳаммасидан берган Зот. Агар Аллоҳнинг неъматларини санамоқчи бўлсангиз, адоғига етолмайсиз. Аммо инсон, ҳақиқатан, доим ноҳақлик ва нонкўрлик қилади.
14:35. Мана Иброҳим деди: “Эй Раббим, бу шаҳарни Омонлик юрти қилгин, мени ва ўғилларимни бутларга сиғинишдан узоқ қилгин.
14:36. Эй Раббим, улар кўп одамни адаштирди. Энди кимки менга эргашса, мендан; кимки менга осий бўлса/эргашишдан бўйин товласа, Сен Ўзинг кечиримли раҳмдилсан.
14:37. Эй Раббимиз, Сенинг Муҳаррам Байтинг яқинида, экинсиз водийга зурриётимдан бир қисмига маскан қилдим. Эй Раббимиз, улар Салотни қоим этсинлар/Кўрсатилган Йўлга эргашсинлар. Сен ҳам одамларни уларга меҳрли-оқибатли айла, ва ҳосиллардан уларга ҳам ризқ бергин, токи шукрини адо этсинлар.
14:38. Эй Роббимиз, бизнинг яширин-ошкор нимамиз бор, ҳаммаси Сенга маълум”. На Ерда на самода Аллоҳдан яширин ҳеч нарса йўқ.
14:39. Кексайган чоғимда менга Исмоил ва Исҳоқни инъом этган Аллоҳга ҳамд-мақтовлар бўлсин. Шубҳасиз, Раббим дуоларни эшитгувчи Зот.
14:40. Эй Раббим, мени Салотни қоим этгувчи қил/Кўрсатилган Йўлга эргашувчи қил, ва зурриётларимдан ҳам, эй Раббимиз, ушбу Дуоимни қабул айла.
14:41. Эй Раббимиз, Ҳисоб қоим этилган Кунда мени, ота-онамни ва муминларни Ўзинг кечир”.
14:42. Золимларнинг қилмишларидан Аллоҳ ғофил/бехабар деб ўйлама, фақатгина уларни шундай бир Кунга кечиктирмоқдаки, унда қўрқувдан кўзлари қотиб қолади,
14:43. Бошларини кўтариб югурадилар, ва қарашлари ўзларига қайтмайди, қалблари ичи бўм-бўш.
14:44. Одамларга Азоб келадиган Кундан огоҳлантир. У Кунда золимлар дейди: “Раббимиз, бизга бироз муҳлат бергин, Сенинг даъватингни қабул этайлик, Расулларингга эргашайлик!”
“Ахир бундан олдин, ҳеч қандай завол етмайди бизга дея, қасам ичмаганмидингиз?
14:45. Ўзларига зулм қилган қавмлар ўрнига келган эдингиз/уларнинг масканини маскан тутгандингиз, уларга қандай муомала қилганимиз ҳам сизларга баён этилган эди, сизларга мисолларини ҳам келтирган эдик”.
14:46. Улар яширин режалар/макр туздилар, аммо уларнинг яширин режалари/макрлари Аллоҳнинг ҳузуридадир, агарчи макрлари тоғларни кўчириб юборадиган макр бўлса ҳам.
14:47. Аллоҳнинг Расулларига берган ваъдасидан(14:13) қайтади деб ўйлама. Аллоҳ Азиз, Интиқом Эгаси/яхшиларни азиз қилади ва ёмонлардан интиқом олади.
14:48. Кун келиб, Ер бошқа ерга алмаштирилганида, Осмонлар ҳам, ва барчалари – Воҳид ва Қаҳҳор/Яккаю-Ягона ва Қаҳри қаттиқ Аллоҳнинг – ҳузурига чиқарилади.
14:49. У Кунда жиноятчиларни кўрасан, бир-бирларига яқин қилиниб занжирбанд этилган бўлади.
14:50. Кийимлари қора мойдан, юзларини олов қоплаган.
14:51. Токи ҳар бир жоннинг касб қилиб топгани берилсин. Аллоҳ – ўта тез ҳисоб қилувчи Зотдир.
14:52. Одамларга етказиладигани мана шу. Токи бу билан огоҳ бўлсинлар ва билсинларки, Унинг Ўзи яккаю-ягона Илоҳдир, ҳамда ақл эгалари Эслатма/Ўгит олсинлар.
