Раҳмон ва Раҳим Аллоҳнинг исми билан (1:1)
35:1. Осмонлару-Ерни йўқдан бор этган, Малакларни/оятларни икки, уч ва тўрт қанотли Расуллар қилиб юборган Аллоҳга ҳамд-мақтовлар бўлсин. Яратишида Ўз истаганини зиёда қилади. Аллоҳ барча нарсага қодир.
35:2. Агар Аллоҳ одамларга Ўз раҳматидан очса, уни тутиб қолгувчи йўқ, агар уни тутиб қолса, бундан кейин уни очгувчи йўқ. Унинг Ўзи Азиз ва Ҳаким /куч-қудрат ва ҳукм-ҳикмат эгаси.
35:3. Эй одамлар, Аллоҳнинг неъматини ёдда тутинг: Аллоҳдан ўзга бирор яратувчи сизга Осмону-Ердан ризқ берадими? Ундан ўзга илоҳ йўқ. Қаёққа/қанчалар бурилмоқдасиз?
35:4. Агар сени ёлғончи десалар, сендан олдинги Расуллар ҳам ёлғончи дейилган. Барча ишлар Аллоҳга қайтарилади.
35:5. Эй одамлар, Аллоҳнинг ваъдаси ҳақ; сизларни дунё ҳаёти алдаб қўймасин, ўша алдагувчи ҳам сизни Аллоҳ билан алдаб қўймасин.
35:6. Шайтон сизнинг душманингиз, бас, уни душман тутинг. У ўз гуруҳини қизиган Оташ эгаларидан бўлишга чорлайди.
35:7. Кофир бўлганлар учун Шиддатли Азоб бор, имон келтирган ва солиҳ амал қилганлар учун эса кечирим ва Улкан ажр-мукофот бор.
35:8. Ишининг ёмонлиги ўзига чиройли кўринган ва уни яхшилик деб кўрган кимсалар учун ғам чекма, Аллоҳ истаганини адаштиради ва истаганини йўлга солади. Аллоҳ уларнинг ишларини билиб туради.
35:9. Аллоҳ шамоллар юбориб булутларни қалқитади, уни ўлик диёрга ҳайдайди, у билан ўлик тупроққа ҳаёт беради. Тирилиб чиқиш ҳам ана шу каби.
35:10. Ким Азизлик истаса, барча Азизлик Аллоҳга хос. Покиза сўз Унга юксалади, солиҳ амал ҳам уни юксалтиради. Ёмонликни макр қилувчилар учун эса Шиддатли Азоб бор. Ана ўшаларнинг макри бузилади.
35:11. Аллоҳ сизларни тупроқдан, сўнг бир нутфадан яратди, сўнгра жуфтлар ҳолига келтирди. Аёлнинг ҳомила кўтариши ҳам, туғиши ҳам Унинг илми билан. Бир жонга умр берилиши ҳам, умрининг озайиши ҳам Китобда/Қонунда. Шубҳасиз, Аллоҳ учун бу осон.
35:12. Икки денгиз бирдек эмас: буниси ширин, ташналикни кетказади, осон ичилади; буниси эса шўр, аччиқ. Барчасидан тоза гўшт ейсиз, тақинчоқ безаклар чиқарасиз. Аллоҳнинг фазлидан насиба истаб, Унга шукрини адо этиш учун денгизни ёриб бораётган кемаларни кўрасан.
35:13. Кечани Кундузга киритади, Кундузни Кечага киритади; Қуёш ва Ойни бўйсундирган, ҳар бири белгиланган вақти-соати сари жараён этади. Раббингиз Аллоҳ мана шундай, Мулк/Ҳукмдорлик ёлғиз Унга хос. Ундан ўзга дуо қилганларингиз эса, ҳатто бир данак пўстлоғига ҳам ҳукм ўтказолмайди.
35:14. Уларга дуо қилсангиз, дуоингизни эшитмайди. Мабодо эшитса ҳам, ижобат қила олмайди. Қиёмат Куни эса сиз қўшган ширкни рад этади. Ҳеч ким сенга Хабардор Зот каби бундан хабар бермайди.
35:15. Эй одамлар, сиз Аллоҳга муҳтожсиз, Аллоҳ эса Ғаний Ҳамид /бой-беҳожат ва мақтовга лойиқ.
35:16. Истаса, сизни кетказиб, янгисини яратади.
35:17. Бу Аллоҳ учун асло қийин эмас.
35:18. Ҳеч бир юк ташувчи ўзганинг юкини ташимас. Юкли юкини олишга чақирса, яқини бўлса ҳам, унинг юкини кўтармас. Сен фақат Раббидан ғоибона қўрқадиган ва Салотни қоим этадиган/Кўрсатилган Йўлга эргашадиганларни огоҳлантира оласан. Ким покланса, ўз фойдасига покланибди. Барча қайтиш ёлғиз Аллоҳга.
35:19. Кўр билан кўрувчи тенг бўлмайди.
35:20. Зулматлар билан нур ҳам.
35:21. Соя билан ҳарорат ҳам.
35:22. Тириклар билан ўликлар тенг эмас. Аллоҳ Ўзи хоҳлаганига эшиттиради, сен қабрдагиларни эшиттира олмайсан.
35:23. Сен фақат огоҳ этувчисан холос.
35:24. Биз сени Ҳақ ила хушхабар берувчи ва огоҳ этгувчи қилиб юборганмиз. Ҳар умматда бирор огоҳ этгувчи ўтган.
35:25. Агар сени ёлғончига чиқарсалар, улардан олдингилар ҳам ёлғон санаганлар; ҳолбуки Расуллар уларга келиб, очиқ баён этилган оятлар-далиллар, саҳифалар ва йўлни ёритгувчи Китоб ила келган эдилар.
35:26. Кейин Мен кофир бўлганларни ушладим. Менинг инкор этишим қандай экан?
35:27. Кўрмадингми, Аллоҳ самодан сув туширди, у билан турли рангда мевалар чиқариб бердик; тоғлардан ҳам оқ-қизил йўл-йўл, қора ва бошқа рангларда мевалар чиқардик.
35:28. Одамлардан, ҳайвонлардан, ва чорва молларидан ҳам шу каби турли рангларда. Аллоҳнинг қуллари орасида фақатгина буни яхши билгувчилар Ундан қўрқади. Аллоҳ Азиз ва Ғафур /барчадан устун қудратли, кечиримли.
35:29. Аллоҳнинг Китобини тиловат қилувчилар, Салотни қоим қилувчилар/Унда Кўрсатилган Йўлга эргашувчилар, Биз берган ризқлардан яширин ва ошкор инфоқ этувчилар, ана ўшалар асло касод бўлмас тижоратдан умид қиладилар.
35:30. Аллоҳ уларнинг эвазларини тўлиқ ўтасин ва Ўз фазлидан зиёда қилиб берсин. Ҳақиқатан, У Ғафур Шакур /кечиримли, амалларга яраша эваз беради.
35:31. Китобдан сенга ваҳй қилганимиз – ўзидан олдингиларни тасдиқлагувчи ҳақиқат. Аллоҳ Басир Хобир /кўргувчи хабардор.
35:32. Сўнгра Китобни Ўз қулларимиз орасидан танлаганларимизга мерос қилдик. Улар орасида ўзларига жабр қилганлар ҳам бор; улар орасида мўътадил қуллар ҳам бор; ва улар орасида Аллоҳнинг изни ила хайрларда пешқадамлар ҳам бор, Улкан Фазл мана шу –
35:33. Адн боғлари… Унга кирадилар, у ерда олтин ва инжу билагузуклар тақадилар, либослари ҳам ҳарир.
35:34. Улар дедилар: “Аллоҳга ҳамд-мақтовлар бўлсин, биздан ғам-ғуссани кетказди. Раббимиз ҳақиқатан Ғафур ва Шакур /кечиримли, амалларга яраша эваз бергувчи”.
35:35. У Ўз фазли ила бизга ушбу диёрни маскан қилиб берди. Бу ерда бизга на чарчоқ етади, на ҳорғинлик.
35:36. Кофирлар учун эса жаҳаннам олови бор. Улар ўлиб қутулмайдилар унда, азоби енгил қилинмайди ҳам. Нонкўрларнинг барчасини ана шундай жазолаймиз.
35:37. Фарёд қиладилар у ерда: “Эй Раббимиз, чиқаргин бизларни, солиҳ амаллар қилайлик энди, қилиб ўтган ишларимизни эмас”. “Эслатма/ўгит олмоқ истаган ўгит олиши учун етарлича умр бермадикми сизга? Сизга огоҳлантирувчи ҳам келди. Шундай экан, тотинг, бундай золимларга ёрдам берувчи ҳеч ким йўқ”.
35:38. Аллоҳ Осмонлару-Ердаги ғайбни/барча сирларни билади. У диллардагини билгувчи.
35:39. У сизни Ер юзида халифа қилди. Кимки бунга куфр келтирса, унинг куфри ўз зарарига. Кофирларнинг куфри Раббининг ҳузурида фақат ғазабни зиёда қилади, кофирларнинг куфри фақат хусронни/зиённи орттиради.
35:40. Сен айт: “Аллоҳдан ўзга дуо-илтижо қилаётган шерикларингиз ҳақида ҳеч ўйлаб кўрганмисиз? Қани кўрсатинг, улар Ер юзида нима яратибди, ёки осмонларда иштироки борми? Ёки уларга бирор китоб берганмиз-у, улар ўша китобдаги аниқ далилларига таянмоқдами? Йўқ аксинча! Бу золимлар бир-бирига фақат алдовни ваъда қилади.
35:41. Аллоҳ Осмонлару-Ерни йиқилишдан тутиб туради. Агар Осмонлару-Ер йиқилса, уларни Ундан ўзга тутиб қолгувчи йўқ. У Ҳалим ва Ғафур /мулойим ва кечиримли.
35:42. Улар Аллоҳга бор кучи билан қасам ичган эдилар: “Агар огоҳлантирувчи келса, биз Тўғри Йўлга ҳаммадан яхшироқ эргашамиз”. Огоҳлантирувчи келгач эса, фақат нафратлари зиёда бўлди,
35:43. Ер юзида кибрланиши ва ёмонлик тузоқлари ҳам. Ёмонлик тузоқларига фақат унинг ўз эгаси тушади. Улар аввалгилар устидаги Суннатдан/Қонуниятдан бошқа нарса кутишаяптими? Аллоҳнинг Суннатида ҳеч қандай ўзгариш топмассан, Аллоҳнинг Суннатида ҳеч қандай оғиш топмассан.
35:44. Улар Ер юзида кезиб, ўтганларнинг оқибати қандай бўлганини кўрмадиларми? Улар булардан кучлироқ-қувватлироқ эди. Осмонларда ҳам, Ерда ҳам Аллоҳни ожиз қолдирувчи/Унга тўсқинлик қила олувчи ҳеч нарса йўқ. Унинг Ўзи Алим ва Қодир /Барча нарсани билгувчи, Барча нарсага Қодир.
35:45. Агар Аллоҳ одамларнинг қилган ҳар қилмиши учун ушлаганида, Ер юзида бирорта тирик жон қолмасди. Лекин уларни белгиланган муддатгача кечиктириб туради. Ажаллари етганда эса… Аллоҳ Ўз қулларини кўриб туради.
