Раҳмон ва Раҳим Аллоҳнинг исми билан (1:1)
46:1. Ҳа Мим
46:2. Аллоҳ тарафидан Китобнинг танзили. У Азиз ва Ҳаким /куч-қудрат ва ҳукм/ҳикмат эгаси.
46:3. Биз Осмонлару-Ерни ҳамда иккиси орасидагиларни фақат ҳақ ила/аниқ маъно ва мақсадга кўра яратдик; ҳамда уларга аниқ муддат белгиладик. Кофир бўлганлар ўзлари огоҳ этилган нарсалардан юз ўгирмоқдалар.
46:4. Сен айт: “Аллоҳдан ўзга дуо қилаётганларингиз ҳақда ҳеч ўйлаб кўрганмисиз? Улар Ердан нималар яратибди экан, менга кўрсатинг-чи? Ёки осмонларнинг яратилишида шерик бўлишганми? Бундан олдин бирор Китоб ёки илмдан асар бўлса келтиринг, рост бўлса”.
46:5. Аллоҳдан ўзгаларга, то Қиёмат Кунигача дуоларини ижобат қилмайдиганларга дуо қилаётганлардан-да адашганроғи борми? Улар ҳатто дуо қилинишидан ҳам бехабар.
46:6. Одамлар жамланадиган Кунда, улар душман бўлади, ва уларга қилинган қулликни тан олишмайди.
46:7. Қачонки уларга очиқ баён этилган оятларимиз тиловат қилинганида, кофирлар ўзларига келган Ҳаққа қарши дедилар: “Бу очиқча сеҳр/йўқни бордек кўрсатиш”.
46:8. Ёки “Уни ўзи уйдирган” дейишадими? Сен айт: “Агар ўзим уйдирган бўлсам, Аллоҳдан келадиган ҳеч нарсани мендан тўхтатиб қололмайсиз. Сиз шўнғиётган бу нарсаларнинг ҳаммасини Унинг Ўзи яхши билади. Сиз билан орамизда гувоҳликка Унинг Ўзи етарли. У Ғафур Раҳим /кечиримли, раҳмдил.
46:9. Сен айт: “Мен Расуллар орасида бидъатчи* эмасман: Ўзимга ёки сизларга қандай муомала қилинади, билмайман. Фақат ўзимга ваҳй қилинганга эргашаман, Очиқ огоҳлантирувчиман холос”. (*ўтмишдаги расуллар айтмаган гапни айтгувчи, расулликка ёт нарсаларни иддао қилувчи эмасман)
46:10. Сен айт: “Ҳеч ўйлаб кўрдингизми, бу агар Аллоҳ тарафидан бўлса-ю, сизлар унга кофир бўлсангиз-чи?! Бани Исроилдан бўлмиш гувоҳ ҳам унинг ўхшашига гувоҳ бўлиб имон келтирган бўлса-ю, сиз кибр қилаётган бўлсангиз-чи?!” Аллоҳ, бундай золимлар қавмини йўлга солмайди.
46:11. Кофир бўлганлар иймон келтирганларга қарата дедилар: “Агар бу яхшилик бўлганида, унга биринчи бўлиб биз келардик”. Ундаги Тўғри Йўлга юрмагач эса: “Бу эскича уйдирма” дейдилар.
46:12. Ундан олдин Мусонинг Китоби бор эди – тўғри йўлга бошловчи раҳбар ва раҳмат эди; бу эса уни тасдиқ этувчи Китоб – Зулм/ноҳақлик қилганларни огоҳ этиш, яхшилик қилганларга мужда бериш учун Арабий тилдадир/очиқ баён ила тушунтирилгандир.
46:13. “Раббимиз Аллоҳ”, деб Тўғри Йўлда собит бўлганлар, уларга хавф-хатар йўқ, улар маҳзун бўлмайдилар.
46:14. Жаннат аҳли ана ўшалар, қилган амаллари эвазига у ерда доимий қоладилар.
46:15. Биз инсонни ота-онасига яхшилик қилишга буюрдик. Онаси уни заҳмат ила кўтаради, қийналиб туғади, ҳомиладорлик ва эмизишдан ажратиши эса ўттиз ой, то куч-қувватга тўлиб, қирқ ёшга етгунича. “Эй Раббим, менга ва ота-онамга берган неъматингга шукр қилишга, ҳамда Ўзинг рози бўладиган солиҳ амаллар қилишга йўллантир мени. Менинг зурриётимда ҳам салоҳиятни бардавом қил. Сенга тавба қилиб қайтдим ва Сенга таслим бўлганлардан бириман”.
46:16. Биз уларнинг энг яхши амалларини қабул қиламиз ва ёмонликларидан кечамиз, улар жаннат аҳли орасида бўладилар. Уларга берилган рост ва содиқ қолинадиган ваъда мана шу.
46:17. Лекин яна биров ота-онасига қарата дедики: “Уф сизларга! Мендан олдин қанча насллар ўтган. Сиз эса: “Қайта тириласан”, деяпсизми менга?” Улар эса Аллоҳга сиғинганча дедиларки: “Вой ҳолингга! Имон келтиргин! Аллоҳнинг ваъдаси ҳақдир!” У эса деди: “Ўтганларнинг афсонаси”.
46:18. Ана ўшалар, олдин ўтган инс ва жин умматлар орасида устларига Сўз ҳақ бўлганлардир. Зиён кўргувчилар ҳам шулар бўлди.
46:19. Уларнинг амалига яраша тўлиқ эвазини бериш ва ҳақлари қолмаслик учун, ҳар бири ўз қилмишига кўра даражага эга.
46:20. Кун келиб, кофирлар Оловга кўндаланг этилади/отилади: “Сизлар бу дунё ҳаётида барча пок насибангизни кетказиб/тугатиб бўлдингиз. Ер юзида ноҳақ кибрланиб, йўлдан озганингиз учун бу Кунда Хорловчи Азобга солинасиз”.
46:21. Од қавмининг биродарини эсла, мана у ўзидан олдин ҳам, кейин ҳам огоҳлантирувчилар ўтган қум тепаликларида қавмини огоҳлантирди: “Аллоҳдан ўзгаларга қуллик/хизмат қилманг. Мен сизга Улуғ Куннинг азоби келишидан қўрқаяпман”.
46:22. Улар дедилар: “Бизни илоҳларимиздан юз ўгиртиргани келдингми? Қўрқитганингни келтир қани, рост бўлса”.
46:23. У деди: “Унинг илми фақат Аллоҳга маълум. Мен фақат сизга етказишим буюрилганини етказаяпман холос, аммо кўриб турибманки, сиз жоҳил қавмсиз”.
46:24. Ниҳоят, кенг булутлар ҳолида водийлари сари келаётган Азобни кўрганларида: “Бу булут бизга ёмғир келтираяпти” дедилар. Йўқ, аксинча! Сизлар шошираётган нарса мана шу – ичида Аламли Азоб бўлган шамол бу.
46:25. У Раббининг Амри ила ҳамма нарсани ҳалок ва маҳв этади. Фақат уларнинг ўз турган жойидан бошқа ҳеч нарса кўринмасди. Жиноятчиларни ана шундай жазолаймиз.
46:26. Биз сизга бермаган имконлар уларга берилганди. Уларга эшитиш, кўриш ва фикрлаш имкони бергандик. Аммо уларга қулоқлар ҳам, кўзлар ҳам, зеҳнлар ҳам фойда бермади. Улар Аллоҳнинг оятларига қарши талашиб-тортишганида, устидан кулганлари ўзларини ўраб олди.
46:27. Биз атрофингиздаги шаҳарларни ҳам ҳалок этганмиз. Қайтсинлар дея оятларни қайта-қайта очиқлаб берганмиз.
46:28. Ўзларига яқин бўлиш учун Аллоҳдан ўзга тутган илоҳлари ёрдам берса бўлмасмиди! Йўқ, аксинча! Улар ғойиб бўлишди. Аслида, улар фақат бўҳтон ва ўзлари уйдирган нарсалари эди, холос.
46:29. Мана, жиннлардан иборат бир ҳайъатни сенга йўналтирдик, улар Қуръонни тингладилар. Ҳозир бўлганларида, дедилар: “Жим бўлиб тингланглар!” Тинглаб бўлиб эса, қавмини огоҳлантириш учун қайтдилар
46:30. Дедилар: “Эй қавмимиз, биз бир Китоб тингладик, у Мусодан кейин нозил қилинган ва ўзидан олдингиларни тасдиқлайди, Ҳақиқатга ва Тўғри Йўлга йўллайди.
46:31. Эй қавмимиз, Аллоҳга чорловчининг чақириғига ижобат қилиб, унга имон келтиринг, сизнинг гуноҳингиздан кечсин, Аламли Азобдан асрасин.
46:32. Кимки Аллоҳга чорловчининг даъватига ижобат қилмаса, у Ер юзида Уни ожиз қилолмайди, ва Ундан ўзга валий ҳам йўқ унга. Ана ўшалар очиқ адашувдадир.
46:33. Осмонлару-Ерни яратган, уларни яратишда толиқмаган Аллоҳ, ўликларни тирилтиришга ҳам қодир эканини кўрмадиларми? Ҳа, албатта, у барча нарсага қодир.
46:34. Кун келиб, кофир бўлганлар оташга кўндаланг қилинади: “Мана шу ҳақиқат эмасми?” Дедиларки: “Ҳа, Раббимизга қасамки, ҳақиқат”. Деди: “У ҳолда ўзингиз инкор этган шу азобни тотасиз энди”.
46:35. Сен сабр қилгин, худди Улул-Азм/қатъият эгалари Расуллар сабр қилгани каби. Булар учун тезлатиб шоширишга уринма. Уларга қилинган ваъдани кўргани Кунда, гўёки бир кунда бир соат қолгандек бўладилар холос. Фақат таблиғ/етказиш холос. Фосиқлардан/йўлдан озганлардан бошқа ким ҳам ҳалок этилсин?
