Раҳмон ва Раҳим Аллоҳнинг исми билан (1:1)
65:1. Эй Набий, аёллар билан ажрашганда, уларнинг иддасига риоя этинг – иддасини тўлиқ ҳисобланг. Раббингиз Аллоҳга тақво қилинг. Идда вақтида уларни уйларидан ҳайдаб чиқарманг. Ўзлари ҳам чиқмасинлар. Фақатгина очиқ-ойдин бузуқлик содир этсалар мустасно. Мана шулар Аллоҳнинг ҳаддлари. Кимки Аллоҳнинг ҳаддларини поймол этса, ўзига жабр қилибди. Балки бундан кейин Аллоҳ янги бирор Иш чиқарар, билмассан…
65:2. Иддалари тугагач, уларни ё маъруф тарзда ёнингизда тутинг, ё маъруф тарзда айрилинг. Орангиздан икки Одил кишини гувоҳ тутинг. Гувоҳликни Аллоҳ учун қоим қилинг. Сиздан Аллоҳга ва Охират Кунига иймон келтирганларга берилаётган ўгит мана шу. Кимки Аллоҳга тақво қилса, унга бир Чиқиш Йўли насиб этади,
65:3. Ҳамда ўзи кутмаган жойдан ризқ беради. Ким Аллоҳга суянса, Аллоҳ унга етарли. Аллоҳ Ўз Амрини рўёбга чиқаради. Аллоҳ ҳар бир нарса учун бир қадр/ўлчов ўрнатган.
65:4. Ҳайз кўришдан умид узган аёллар эса, агар улардан шубҳада бўлсангиз, уларнинг кутиш муддати уч ой, ҳайз кўрмай турганлар ҳам. Ҳомиладор бўлганларнинг кутиш муддати – ҳомилани туққунигача. Ким Аллоҳга тақво қилса, унинг ишини осон қилади.
65:5. Бу – Аллоҳнинг сизга нозил қилган амри/буйруғи. Ким Аллоҳга тақво қилса, унинг ёмонликларини ўчириб, ажр-мукофотини зиёда қилади.
65:6. Ажрашган аёлларга ўз масканларингизда (имконингиз доирасида) жой беринг; уларни танг аҳволга солиш учун зарар етказишга уринманг. Агар ҳомиладор бўлсалар, туққунига қадар уларга инфоқ қилинг. Агар фарзандни эмизиб ҳам берсалар, у ҳолда ҳаққларини ўтанг; ўзаро маъруф тарзда гаплашинг/келишинг. Агар ҳаққни ўташда қийинчиликка дуч келсангиз, у ҳолда болани бошқа аёл эмизсин.
65:7. Кимнинг ризқи кенг бўлса, кенг ризқига кўра берсин. Кимнинг ризқи ўлчовли бўлса, Аллоҳнинг берганидан инфоқ этсин. Аллоҳ бир жонга нима берган бўлса, фақат ўшанга кўра масъулият юклайди. Аллоҳ қийинчиликдан кейин қулайлик яратади.
65:8. Қанчадан-қанча шаҳарлар Раббининг ва Расулларининг амридан бўйин товлади, Биз ҳам уларни шиддатли ҳисобга тортдик ва мисли кўрилмаган азоб билан азобладик.
65:9. Улар ишларининг оқибатини тотдилар, ишларининг оқибати тамоман хусрон/бой бериш бўлди.
65:10. Аллоҳ уларга шиддатли азоб тайёрлаб қўйган. Шундай экан, Аллоҳга тақво қилинг, эй ақл эгалари, эй имон келтирганлар. Аллоҳ сизга Зикр/Эслатма нозил қилган.
65:11. Бир Расул юборди, сизга Аллоҳнинг очиқ-ойдин оятларини тиловат қилмоқда, токи иймон келтирган ва солиҳ амал қилганларни зулматлардан нур сари олиб чиқсин. Ким Аллоҳга иймон келтирса ва солиҳ амал қилса, уни остидан анҳорлар оққан, ичида абадий қоладиган боғ-роғларга киритади. Аллоҳ унга гўзал ризқ беради.
65:12. Аллоҳ, етти Осмонни ва Ердан ҳам уларнинг мислини яратган Зотдир. Амр/борлиқ ишлари улар орасида нозил бўлади. Токи билгайсизки, Аллоҳ барча нарсага қодир ҳамда Аллоҳ барча нарсани илми ила қамраб олган.
