Раҳмон ва Раҳим Аллоҳнинг исми билан (1:1)
70:1. Сўрагувчи Воқеъ бўлғуси Азобни сўради,
70:2. Уни кофирлардан дафъ этгувчи йўқ.
70:3. Юксалиш ўринлари/вақтлари Эгаси Аллоҳдан –
70:4. Малаклар ва Руҳ Унга миқдори эллик минг йиллик Кунда юксалади.
70:5. Шу боис, Чиройли Сабр қил. (Чиройли сабр – 12:18; 12:83)
70:6. Уларга у узоқ кўринади.
70:7. Бизга эса яқин кўринади.
70:8. У Кунда само эриган маъдан каби,
70:9. Тоғлар эса жун каби,
70:10. Қалин дўст дўстининг ҳолидан сўрмас,
70:11. Бир-бирларини кўриб турсалар ҳам, жиноятчи у Кунги азобдан қутулиш учун фидя беришга тайёр: ўғилларини,
70:12. Аёлини, ака-укасини,
70:13. Ўстирган оиласини,
70:14. Ва ер юзидаги барчани берса-ю, жонини қутқарса.
70:15. Йўқ! Қиздирилган Оташ бу,
70:16. Териларни қовуриб шилади,
70:17. Бирма-бир чақиради: терс бурилганни, юз ўгирганни –
70:18. Йиғиб, ғамлаганни.
70:19. Ҳақиқатан, инсоннинг яратилишида бойликка ҳирс бор:
70:20. Ёмонлик тегса, нолийди,
70:21. Яхшилик тегса, қизғанади.
70:22. Аммо Тўғри Йўлда пешқадамлар* мустасно: (*Мусоллийн – Аллоҳнинг кўрсатган Тўғри Йўлига бошловчи пешволар)
70:23. Улар ўз эргашган йўлида бардавом зотлар,
70:24. Уларнинг молларида муайян ҳаққ бор
70:25. Сўровчи ва маҳрумлар учун.
70:26. Улар Дин Кунини тасдиқ этадилар,
70:27. Раббининг Азобидан қўрқадилар.
70:28. Зеро Унинг Азобидан омон қолиш имконсиз.
70:29. Улар иффатини сақлайдилар,
70:30. Фақат ўз жуфтлари/тенглари, яъни масъулият олганлари мустасно, улар маломат қилинмайдилар,
70:31. Лекин ким бундан нарига интилса, ҳаддан ошувчилар ана ўшалардир,
70:32. Улар омонат ва аҳдига риоя қиладилар.
70:33. Улар тўғрилик билан гувоҳлик берадилар.
70:34. Улар Салотини/Эргашган Йўлини муҳофаза* этадилар.
(*Молидан бераркан 70:22-25, улардан эваз тамаъ қилмайдилар)
70:35. Ана ўшалар боғ-роғларда иззат-икром қилинади.
70:36. Кофир бўлганларга нима бўлди, сен томон бўйин чўзиб шошадилар?
70:37. Ўнгу-чапдан, кўплашиб?
70:38. Наҳотки, ҳар биттаси жаннатга киритилишни истаётган бўлса?
70:39. Йўқ ундай эмас! Биз уларнинг қандай яратилганини маълум қилдик.
70:40. Йўқ, Шарқларнинг ва Ғарбларнинг Раббига қасамки, Бизнинг қудратимиз етади
70:41. Уларнинг ўрнига яхшироқ қавмни келтиришга. Бизга ҳеч ким тўсиқ бўлолмайди.
70:42. Шундай экан, қўявер уларни, ўйнаб-шўнғиб қолишсин, бу фақат уларга ваъда қилинган Кунгача холос,
70:43. У Кунда улар тез-тез қабрдан чиқиб келадилар, худди маррага қараб чопаётгандек,
70:44. Кўзлари қуйи, юзларини хорлик қоплаган. Уларга ваъда қилинган Кун – ана ўша Кун.
