Раҳмон ва Раҳим Аллоҳнинг исми билан (1:1)
78:1. Ўзаро нима ҳақда сўрашмоқда?
78:2. Буюк Хабар ҳақида (38:67)
78:3. Улар у ҳақда ихтилофда.
78:4. Йўқ! Яқинда билиб олишади.
78:5. Яна бир бор Йўқ! Яқинда билиб олишади.
78:6. Ерни бешик қилиб бермадикми?
78:7. Тоғларни қозиқ қилиб бермадикми?
78:8. Ва сизларни жуфтлар ҳолида яратмадикми?
78:9. Уйқунгизни ором қилдик,
78:10. Тунни эса либос қилдик,
78:11. Кунни тириклик вақти қилдик,
78:12. Тепангизда етти шиддатли само бино этдик,
78:13. Ва порлоқ ёритган чироқ яратдик,
78:14. Ва мўл сув туширдик зич булутлардан,
78:15. Улар билан дону-наботот,
78:16. Туташ боғлар чиқариш учун.
78:17. Ҳақиқатан, Фасл/Ажралиш Куни (яхши ва ёмон ораси айриладиган Кун) вақти тайин этилган.
78:18. Сур чалинган Кунда, сиз гуруҳлар ҳолида келасиз.
78:19. Само очилади, эшиклар бўлади,
78:20. Тоғлар юритилади, сароб бўлади.
78:21. Жаҳаннам пистирма жойи бўлади.
78:22. Туғёнга кетганлар учун қайтиш жойи у.
78:23. Асрлар бўйи қолинади унда.
78:24. Унда на бир салқинлик, на бир ичгулик тотадилар,
78:25. Нуқул қайноқ сув ва йиринг,
78:26. Уларга лойиқ эваз ўлароқ,
78:27. Улар ҳеч қандай Ҳисобни умид қилмас эдилар,
78:28. Оятларимизни ёлғон санаб инкор этардилар.
78:29. Биз эса барча нарсани санаб ёзиб қўйгандик.
78:30. Тотинглар, сизга фақат Азобни зиёда қиламиз.
78:31. Тақво эгалари учун ютуқлар
78:32. Боғлар, узумзорлар,
78:33. Тенг етилган шингиллар,
78:34. Тўла-тўла қадаҳлар,
78:35. Унда бееҳуда сўз ҳам, ёлғон ҳам эшитмаслар;
78:36. Бу – Раббингдан мувофиқ ажру-мукофот
78:37. Осмонлару-Ернинг ва иккиси орасининг Рабби. Раҳмоннинг ҳузурида берухсат хитоб қилинмас.
78:38. Кун келади, Руҳ ва Малаклар саф бўлиб туради. Раҳмон изн берганидан бошқа ҳеч ким гапирмайди, улар ҳам фақат ҳақни сўйлайди.
78:39. Ана ўша Кун Ҳақиқат. Ким истаса, Рабби сари йўл олади.
78:40. Сизларни яқин азобдан огоҳ этдик. У Кунда киши ўз қилмишига назар солади, кофир эса: “Кошки тупроқ бўлсам!” дейди.
