Раҳмон ва Раҳим Аллоҳнинг исми билан (1:1)
79:1. Суғуриб чиқарганлар,
79:2. Енгил тин олганлар,
79:3. Сузиб-оқиб борганлар,
79:4. Пойгалашиб, ўзганлар,
79:5. Ишни тадбир этганлар!
79:6. У Кунда ўша шовқин ларзага солади,
79:7. Ортидан яна бир шовқин келади.
79:8. У Кунда қалблар даҳшатдан титрайди,
79:9. Кўзлари қўрқувдан тубан боқади.
79:10. Дейдиларки: “Биз ростдан ҳам шу чуқурда эски ҳолимизга қайтариламизми?
79:11. Суяклар чириб бўлгандан кейин ҳамми?
79:12. Ундай эса, бу қайтиш – бой бериш-ку”.
79:13. Ҳолбуки, биргина Ҳайқириқ,
79:14. Ва улар дарҳол майдонда уйғоқ.
79:15. Мусонинг ҳадиси/ҳикояси келдими сенга?
79:16. Мана, Рабби муқаддас Тува водийсида унга хитоб қилди:
79:17. “Фиръавнга бор, зеро у Туғёнга кетди.
79:18. Унга айт: “Покланиш истармисан?
79:19. Сенга Раббинг сари йўл кўрсатайин, токи Унинг ҳимоясига қиргайсан”.
79:20. Унга буюк оят-далилларни кўрсатди.
79:21. Лекин у ёлғон санади, бўйин товлади.
79:22. Сўнг юз ўгириб, ишга киришди.
79:23-24. Тўплаб, бақирди: “Мен Сизнинг Энг Олий Раббингизман!”
79:25. Аллоҳ уни Илк ва Сўнгги Азоб билан ушлади.
79:26. Бунда тақво эгалари учун оят-ибрат бор.
79:27. Яратилиш жиҳатидан сиз кучлимисиз ёки Самоми? Уни яратди,
79:28. Қалинлигини кўтариб, тартибга келтирди,
79:29. Тунни қоплаб, қорайтирди, Тонгни оттирди,
79:30. Шундан сўнг у Ерни ёйиб текислади,
79:31. Ундан сув ва яйловлар чиқарди,
79:32. Тоғларни ўрнатди,
79:33. Сиз ва чорвангиз тириклиги учун.
79:34. Барча нарсани бостирадиган улкан фалокат келганда,
79:35. У Кунда инсон нималар ортидан чопганини эслайди.
79:36. Кўриб турганлар учун жаҳаннам ўртага чиқарилади.
79:37. Кимки ҳаддидан ошса/Туғёнга кетса,
79:38. Ва шу дунё ҳаётини афзал кўрса,
79:39. Унинг борар жойи жаҳаннамдир.
79:40. Кимки Раббининг мақомидан хайиқиб, ҳаводан/ғаразли истаклардан тийилса,
79:41. Унинг борар жойи жаннатдир.
79:42. Сендан Қиёмат Соати ҳақида сўрайдилар: “Қачон келади ўзи?”
79:43. Сен қайда-ю, унинг вақтини эслатиш қайда?!
79:44. Бунинг илми ёлғиз Раббингга оид.
79:45. Сен фақат Ундан хайиққанларни огоҳ этувчисан холос.
79:46. Уни кўрганларида, худди бир оқшом ёки тонгдан бироз вақт қолгандек бўлишади.
