Раҳмон ва Раҳим Аллоҳнинг исми билан (1:1)
85:1. Буржлар жойлашган Само
85:2. Ҳам ваъда қилинган Кун,
85:3. Гувоҳ ва унинг гувоҳ бўлгани/иштирокчи ва иштирок этгани воқеъа.
85:4. Димоғ эгалари ҳалок бўлди! (111:1-3)
85:5. Ўтин тўла Олов эгалари! (Ўтинлари тош ва одамлар бўлган Олов – 2:24; 111:4-5)
85:6. Мана, улар унинг/Оловнинг бошида ўтирибди.
85:7. Ва муминларга қилинган муомалага гувоҳ бўлмоқда.
85:8-9*. Улар муминларни фақатгина Азиз ва Ҳамид Аллоҳга /барчадан устун ва мақтовларга лойиқ Аллоҳга – Осмонлару-Ернинг Подшоҳлиги Унга тегишли бўлган Аллоҳга – ишонганлари учун ёмон кўрган эдилар. Аллоҳ эса барча нарса устида гувоҳ. (*Кофир ва мушрик катталари фақат ўзларига азизлик ва ҳамд нисбат этарди – 3:188)
85:10. Мумин ва муминаларга фитна/тузоқ қурган, сўнг тавба қилиб қайтмаганларга Жаҳаннам азоби, ёнғин азоби бор.
85:11. Имон келтирган ва солиҳ амал қилганлар учун остидан анҳорлар оққан боғ-роғлар бор. Улкан Ютуқ ана шу.
85:12. Ҳақиқатан, Раббингнинг чангали шиддатли.
85:13. Илк яратиб бошлаган, сўнгра қайтарган Унинг Ўзи,
85:14. Ғафур/Кечиргувчи ва Вадуд/Яхши Кўргувчи ҳам Унинг Ўзи,
85:15. Арши-Мажид/Олий Аршнинг Рабби,
85:16. Ўз иродасини мудом рўёбга чиқаради.
85:17. Қўшинларнинг хабари келдими сенга?
85:18. Фиръавн ҳамда Самуднинг?
85:19. Аксинча, кофир бўлганлар ёлғон санашда,
85:20. Аллоҳ эса уларнинг ортидан қуршаб олади.
85:21. Ҳолбуки, бу – Олий қилувчи/Мажид Қуръон,
85:22. Муҳофаза этилган лавҳаларда.
